Ndahet nga jeta babai i MP3

Një shkencëtar kompjuterik izraelit, kërkimi i të cilit në kompresimin e të dhënave çoi në zhvillimin e skedarit MP3, ka ndërruar jetë. Algoritmet e profesor Abraham Lempel mbështetën gjithashtu formatet TIFF, PNG, ZIP dhe GIF, të gjitha këto janë në përdorim të gjerë sot.

Lempel vdiq të dielën në moshën 86-vjeçare, raportoi faqja e lajmeve izraelite Ynet. Ai kishte qenë profesor emeritus në institutin kërkimor Technion në Haifa dhe u përshkrua nga presidenti i institutit si një nga shkencëtarët më të rëndësishëm në historinë e Technion.

"I ndjeri Prof. Emeritus Lempel ishte një burim frymëzimi për të gjithë ne dhe ishte ndër studiuesit më të mëdhenj që Technion ka prodhuar në njëqind vitet e tij," tha Presidenti Uri Sivan. “Algoritmi Lempel-Ziv ka kontribuar në botë, pa pagesë, një teknologji të paprecedentë që mundëson transferimin e të dhënave shpejt dhe pa humbje”.

Lempel dhe kolegu i tij, Prof. Jacob Ziv, publikuan versionin e parë të algoritmit Lempel-Ziv, LZ77, në 1977, duke e ndjekur atë një vit më vonë me një version të modifikuar të quajtur LZ78.

Këto algoritme lejuan kompresim pa humbje, një zbulim që do të ishte me përfitim të madh vite më vonë për dërgimin e file-ve përmes internetit, gjë që kërkon të kompresohen në një pjesë të madhësisë së tyre origjinale për transferim efikas. Formatet e skedarëve TIFF, PNG, ZIP dhe GIF bazohen të gjithë drejtpërdrejt në algoritmet LZ77 dhe LZ78, ndërsa skedarët PDF dhe MP3 bazohen në derivatet e tyre.

Talenti i Lempel e bëri gjigantin amerikan HP ta punësonte atë në 1993. Ai vazhdoi të menaxhonte operacionin izraelit të firmës deri në vitin 2007. Gjatë asaj kohe, kompania regjistroi tetë patenta në emrin e tij.

Lempel do të merrte gjithashtu çmimin e Jubileut të Artë 1998 për Inovacionin Teknologjik nga Shoqëria e Teorisë së Informacionit IEEE dhe Medaljen IEEE Richard W. Hamming 2007 për "punën pioniere në kompresimin e të dhënave".