Vrasja e 35-vjeçarit grek, protestë me tone raciste para Ambasadës së Shqipërisë në Athinë

Vrasja e 35-vjeçarit Kostandinos Kaçifas, pasditen e djeshme gjatë një shkëmbimi zjarri me policinë në Bularat të Gjirokastrës, është pasur nga reagimi zyrtar i Greqisë.

Nëpërmjet një deklarate për shtyp,  thuhet se Athina zyrtare e ka ndjekur që nga momenti i parë, incidentin në fshatin Bularat të Shqipërisë, ku një shtetas grek raportohet të ketë hapur zjarr me armë kallashnikov kundër një makine të policisë shqiptare, e cila tentoi arrestimin e tij. Ministria e Jashtme greke e cilëson të papranueshëm faktin që operacioni precipitoi me humbjen e një jete njerëzore dhe kërkon nga autoritetet zbardhjen e plotë të rrethanave në të cilat humbi jetën qytetari grek.

Ndërkohë, nuk ka munguar përgjigjja edhe nga pala shqiptare. Kryeministri Rama me anë të një statusi në rrjetin social “Tuiter”, u shpreh se në vend që ta quajë të papranueshme humbjen e jetës së një të “fantaksuri”, i cili qëlloi me armë ndaj policisë, Greqia duhet t’i bashkohet Shqipërisë për t’u lutur dhe falënderuar Zotin për jetët që shpëtuan nga shkëmbimi i zjarrit.

“Fqinj të dashur! Në vend ta quani të papranueshme humbjen e jetës së një të fandaksuri që qëlloi me plumba luftarakë mbi policinë tonë, e cila bëri vetëm detyrën e saj, bashkohuni me ne në falënderimin e Zotit që asnjë jetë e pafajshme nuk humbi sot nga marrëzia ekstremiste”, thuhet në reagim.

Reagimi në Athinë shkoi përtej një deklarate të thjeshtë zyrtare. Një grup protestuesish u mblodhën para Ambasadës së Shqipërisë, duke mos kursyer thirrjet raciste ndaj shqiptarëve.

“Shqiptarët vrasës, po vrisni vëllezërit tonë në tokën greke”, ishte një nga thirrjet e dëgjuara gjatë tubimit para Ambasadës së Shqipërisë në Athinë. Ndërsa në një tjetër thirri: “Çekiç dhe zjarr për qentë shqiptarë”.

Ata kanë tentuar të futen më forcë në ambasadën shqiptare në Greqi, por policia greke ka rrethuar godinën më forca të shumta sigurie.