Me dhimbje ju njoftoj se Papa emeritus Benedikti XVI ndërroi jetë sot në orën 09:34 në manastirin Mater Ecclesiae në Vatikan. Informacione të mëtejshme do të vijojnë në momentin e parë që do jetë e mundur.
Kështu deklaroi paraditen e sotme drejtori i Zyrës së Shtypit të Selisë së Shenjtë të Vatikanit, Matteo Bruni.
Pas një sëmundje të gjatë, Papa Emeritus, Benedikti XVI vdiq mëngjesin e sotëm në Romë.
Gjendja shëndetësore e Papës 95 vjeç, u përkeqësuan disa ditë para Krishtlindjeve.
Trupi i Papës së ndjerë do të ekspozohet në sheshin e Shën Pjetrit në Vatikan, nga mëngjesi i së hënës, 2 janar 2023, për përshëndetjen e fundit me besimtarët.
Papa Benedikti XVI, emri laik i të cilit është Joseph Aloisius Ratzinger, ishte Papa i 265-të i Kishës Katolike dhe sovrani i shtatë i qytetit të Vatikanit. Ai u zgjodh më 19 prill 2005 pas vdekjes së Papa Gjon Palit II, nga kardinalët që votuan në konklavë.
I shuguruar si prift në vitin 1951 në vendin e origjinës, Bavari, Gjermani, Ratzinger filloi një karrierë akademike dhe u vendos si një teolog shumë i vlerësuar nga fundi i viteve 1950.
U emërua profesor i rregullt në vitin 1958 në moshën 31-vjeçare. Pas një karriere të gjatë si profesor i teologjisë në disa universitete gjermane, ai u emërua Kryepeshkop i Mynihut dhe Freising.
Në vitin 1981 u thirr në Romë për të qenë prefekt i Kongregatës për Doktrinën e Fesë nga Papa Gjon Pali II, i cili vite më vonë e emëroi atë Dekan të Kolegjit të Kardinalëve dhe, si të tillë, Kardinal-Peshkop i Ostias në 2002.
Si kardinal i Kishës, Ratzinger ishte i pranishëm në tre konklava: në atë të gushtit 1978, në atë të tetorit të po atij viti dhe në atë të vitit 2005, që rezultoi në zgjedhjen e tij si Papë.
Më 28 shkurt 2013, dha dorëheqjen nga papati, duke marrë titullin e Papës emeritus, me synimin për t’iu përkushtuar lutjes dhe një tërheqjeje shpirtërore.
Dorëheqja e tij u njoftua nga ai vetë disa ditë më parë, më 11 shkurt, duke u cilësuar si një vendim i jashtëzakonshëm në Historinë e Kishës.
Pas dorëheqjes së tij, u mbajt konklava nga e cila u zgjodh Kardinali Jorge Mario Bergoglio, Kryepeshkop i Buenos Aires, si Pap Romak, i cili mori emrin Papa Françesko.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
