Aktivistja Brisida Gjikondi e sheh Kuvendin e sotëm të Berishës si kurorëzimin e nismës së tij për t’u treguar ndërkombëtarëve se ka mbështetje. Në studion e lajmeve të MCN TV, Gjikondi tha se i vetmi motivim pas kësaj është mbrojtja e interesave të tij personale.
“Ajo që pritej, Berisha po luan me ekzistencën e tij dhe të familjes së tij: morale, politike dhe financiare. Kuvendi është një kurorëzim i gjithë rrugëtimit për të krijuar impakt para ndërkombëtarëve, për të treguar që kam mbrapa popullin dhe po më prekët mua do prekni edhe shqiptarët”.
Pjesëmarrjen e lartë të mbështetësve në stadiumin “Air Albania”, Gjikondi e sheh si një fenomen të përsëritur që i karakterizon shqiptarët herë pas here: pozicionimin në anën e gabuar të historisë.
“Pjesëmarrja nuk është tregues. Shqiptarët në historinë e tyre, në momente të caktuara, një numër jo i vogël kanë dalë në krah të personit të gabuar. Nuk po përmend Haxhi Qamilin, por edhe gjatë diktaturës. Për mua nuk është tregues, edhe Hitleri ka pasur ndjekësit e tij. Por për mua kjo tregon sa e rëndë është situata në politikën shqiptare, edhe nga e majta, edhe nga e djathta. Që një lider autoritar, në momentin që bie kërkon të marrë me vete edhe partinë, që mendon se është e tija. Nuk shikon përtej interesit personal”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
