Analisti Mustafa Nano, në një intervistë për MCN, komentoi deklaratën e Elon Musk për krijimin e një partie të re politike në SHBA, duke e cilësuar si një lëvizje emocionale pa ide të mirëfillta politike, nëse nuk llogarisim shqetësimin e tij për rritjen e borxhit publik e ndonjë shqetësim tjetër të kësaj natyre.
Nano thekson se Musk nuk përfaqëson një kërcënim të vërtetë për dy partitë tradicionale, por hyrja e tij në zgjedhje mund të dëmtojë Partinë Republikane. Ai shton se nuk është ende e qartë si do të sillet Musk si politikan, pasi publiku e njeh vetëm si biznesmen.
Më tej, Nano u ndal edhe në çështje të tjera ndërkombëtare si lufta në Gaza, ku vlerëson se ka krime lufte nga Izraeli, por nuk e konsideron situatën si gjenocid.
Përsa i përket ri-islamizimit tek të rinjtë në Shkodër, Nano tha se Islami po gëzon një momentum të vetin, por sipas tij mbetet një fe konservatore dhe e prapambetur që nuk i përgjigjet kohës moderne.
Intervista e plotë:
-Z. Nano, Elon Musk njofton një parti të re duke deklaruar se do tu kthejë lirinë amerikanëve. Për cilat liri është fjala pasi z. Musk u akuzua se tentoi të merrte të gjithë bazën e të dhënave të fondit të sigurimeve në SHBA?
-Në SHBA ekziston rreziku i autoritarizmit sepse Trump po luan në mënyrë agresive në politikën e brendshme, por kjo lëvizje mund të konsiderohet edhe thjesht inatçore. Është lëvizja politike e një njeriu të zemëruar, gjë që duket te fakti se ideja për një parti të re i lindi pas konfliktit me Trumpin. Nuk duket se është njeriu i duhur për të bërë lëvizje të tilla. Ai ka dëshmuar se është inovativ si biznesmen, por në politikë, për aq sa qëndroi, nuk demonstroi ndonjë gjë kushedi se çfarë.
-E shihni në mënyrën si zhvillohen sot fushatat zgjedhore, Elon Musk një kërcënim për dy partitë e tjera tradicionale në SHBA?
-Ai mund të dëmtojë partinë Republikane dhe nëse futet në zgjedhjet midterm të vitit te ardhshëm ai sigurisht nuk mund të fitojë sepse është koha shumë e shkurtër. Por dëmin e bën të madh edhe sikur te marrë disa senatorë. Nëse kjo ndodh, atëherë Trumpi humbet maxhorancën në Senat, e ndoshta edhe në dhomën e përfaqësuesve. Kështu, Trumpit do t'i bëhej e vështirë të drejtonte Amerikën.
-Si e vlerësoni presidencën Trump deri më tani: z. Trump bën shumë zhurmë, por në të vërtetë nuk ngjan të jetë në thelb radikal. U tërhoq nga tarifat, negociata për NATO-n, madje edhe për Iranin u raportua se ishte kundër sulmit. Çfarë politike e jashtme është kjo mendoni ju?
-Trump deri tani ka tundur flamurin e njeriut të paqes, por nuk duket edhe aq shumë si njeri i paqes dhe ai në ngjarjen e fundit u përfshi fare kollaj në konfliktin e Iran-Izrael pa u menduar gjatë dhe këtë nuk e bënë dikush qe do paqe. Por edhe nuk mund të thuhet se është tërhequr. Janë zhvillime në proces. Me Europën e Kanadanë po luan fort. Me Putinin ende nuk dihet se ai do finalizohet marrëdhënia. Etj.
-Z. Nano ju mendoni se në Gaza është bërë një genocid?
-Kohën e fundit kemi parë që Netanahy është duke kaluar vijën e kuqe në një numër rastesh, por është e vështirë të flasësh për genocid. Akuza për genocid është e madhe dhe ekstreme. Lëre pastaj që kjo akuzë bëhet nga ata që kanë folur për genocid që në momentin e parë kur nisi sulmi. Unë nuk shoh genocid. Kemi ndoshta krime lufte, nëse kemi parasysh vrasjen e fëmijëve e grave, por Izraeli thotë ne tani jemi në luftë dhe lufta ka dëme anësore. Këtë luftë nuk e nisi Izraeli. thotë që ka një alibi për të vazhduar luftën. Sidoqoftë, përsëris, Netanahy është duke e shkelur vijën e kuqe, dhe po i sëkëlldis shumë mbrojtësit e tij nëpër botë.
-Po që Netanyahu është një kriminel lufte?
-Mendoj se janë dy gjëra të ndryshme. Edhe sikur të biem dakord se janë kryer krime lufte, jo domosdoshmërish këto krime lidhen me kreun e qeverisë. Pastaj, unë nuk jam dakord me kollajllëkun me të cilin një lider i zgjedhur shpallet kriminel lufte. Edhe me Putinin është bërë gabim. Është gabim përsa kohë që do jetë nevoja e tyre në çdo negociatë të mundshme të ardhshme.
-Si e analizoni qëndrimin e deritanishëm të Perëndimit ndaj Izraelit?
-Perëndimi dhe Europa ka një qëndrim të ngrirë në kohë me Izraelin. Të gjithë mendojnë që hebrenjtë duhet të kenë vendin e tyre atje ku e kanë dhe mendojnë që Izraeli është i vetmi aleat i SHBA në Lindjen e Mesme dhe nuk do lejojnë që ai vend të zhduket. Perëndimi është nuni apo kumbari i Izraelit. Gjithnjë do ta mbrojë.
-Shihni ju një frymë në rritje antisemitizmi në Shqipëri për shkak të raportimit të kësaj lufte?
-Ka një rritje antisemitizmi në të gjithë botën, por në Shqipëri do të ketë një frymë të tille që e lidh me origjinën fetare dhe ata e kanë këtë gjë pa qenë lufta. Kam parë që ka antisemitizëm, ekziston. Por në perëndim ka shumë më tepër.
-Një pyetje e fundit: dje kishim një intervistë të z. Myftari që fliste për një përhapje masive të Islamit te të rinjtë në Shkodër. Me çfarë duhet ta shpjegojmë këtë ri-islamizim të një pjese të rinisë?
-Çdo vit në këto manifestimet publike që bëhen dhe këto faljet nëpër sheshe, krijohet ideja që sheh më shumë njerëz se viti i shkuar. Pastaj, më duket sikur shoh çdo ditë e më shumë femra të mbuluara në rrugë. Islami sot është duke gëzuar një lloj momentumi. Në një moment, kur bota është dhënë pas disa vlerave postmoderniste, me transgenderat, prindi një e prindi dy, etj, ka njerëz që e shohin Islamin si ideologji e nevojshme konservatore për të balancuar situatën e vlerave. Pastaj, kishat e zbrazura në Europë e kriza e krishterimit në Europë shoqërohet vetvetiu me rritje të Islamit. Por ky fakt mua nuk më gëzon. Unë e shoh Islamin si një ideologji të shekullit VII, ndërsa myslimanët i shoh si njerëz që kanë përqafuar një ideologji të prapambetur.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
