Asim Vokshi është zgjedhur anëtari i ri Gjykatës Kushtetuese, duke zëvendësuar Holta Zaçen.
Në ambientet e Gjykatës së Lartë, u zhvillua Mbledhja e Posaçme e gjyqtarëve të kësaj gjykate, ku pas procedurës së votimit rezultuan Asim Vokshi me 6 vota, Naureda Llagami me 8 vota dhe Florian Ballhysa me 0 vota.
Në njoftimin e Gjykatës së Lartë thuhet:
"Në kushtet kur parashikimet ligjore përcaktojnë se shpallet fitues kandidati që merr 3/5 e votave të pjesëmarrësve, dhe në rastin e votimit të sotëm ku asnjë nga kandidatët nuk e arriti këtë prag, komisioni shpall fitues kandidatin e renditur të parin nga Këshilli i Emërimeve në Drejtësi. Në këto kushte, Asim Vokshi zgjidhet anëtar i Gjykatës Kushtetuese".
Vendimi për zgjedhjen e Vokshit i komunikohet menjëherë Kryetarit të Kuvendit, Presidentit të Republikës dhe Kryetarit të Gjykatës Kushtetuese, si dhe do të publikohet në Qendrën e Publikimeve Zyrtare.
Gazetari Arsen Rusta në një raportim për Mcn Live bën me dije se
“Asim Vokshi është një magjistrat karriere që vjen nga radhët e Gjykatës së Tiranës. Tashmë ai do të jetë anëtar i Gjykatës Kushtetuese. Tashmë 9 anëtarët do të zgjedhin drejtuesin e ri të GJK, dhe ky proces pritet të vijojë javën e ardhshme. Kjo është dita e fundit le të themi juridikisht e Holta Zaçajt në detyrë, por ajo do të jetë aty deri në mbërritjen e Asim Vokshit pas dekretimit nga Presidenti. Nga ana tjetër pritet që vet Gjykata e Lartë të futet në proces zgjedhjesh për zëvendësuesin e Asim Vokshin, pasi mbetet një vend vakant.
Shumëkush mund të pyesë si është e mundur që Asim Vokshi me 6 vota është zgjedhur gjyqtar Kushtetues dhe jo Llagami që ka më shumë vota. Sipas ligjit nëse askush s’merr 3/5 e votave atëherë zgjidhet ai që KED ka renditur të parën. I pari me pikë ishte renditur Asim Vokshi”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
