Ministri i Jashtëm i Iranit, Abbas Araghchi, deklaron se sulmet ndaj Izraelit do të përfundojnë sapo Izraeli të ndalojë fushatën e tij ushtarake kundër Republikës Islamike.
“Ne po mbrojmë veten, mbrojtja jonë është plotësisht legjitime. Kjo mbrojtje është përgjigjja jonë ndaj agresionit. Nëse agresioni ndalet, natyrisht që edhe përgjigjet tona do të ndalen”, tha Araghchi në një takim me diplomatë të huaj.
Irani qëlloi dhjetëra raketa balistike drejt Izraelit të shtunën në mbrëmje dhe të dielën në mëngjes, shumë prej të cilave kishin në shënjestër zona civile.
Të paktën 10 izraelitë u vranë në sulmet e natës.
Ministri i Jashtëm tha se sulmet izraelite në fushën e gazit në det të hapur të Parsit Jugor që Irani e ndan me Katarin ishin një agresion i hapur dhe një akt shumë i rrezikshëm.
“Zvarritja e konfliktit në Gjirin Persik është një gabim strategjik dhe qëllimi i tij është ta zvarrisë luftën përtej territorit iranian”, thotë ai.
Ministri i jashtëm akuzon Izraelin se po përpiqet të sabotojë bisedimet bërthamore Iran-SHBA që po zhvillohen vazhdimisht, të cilat sipas tij mund të kishin hapur rrugën për një marrëveshje.
Teherani ishte gati të paraqiste një propozim këtë të diel gjatë një raundi të gjashtë bisedimesh, të anuluar tashmë.
“Sulmi i Izraelit nuk do të kishte ndodhur kurrë pa dritën jeshile dhe mbështetjen e SHBA. Është e nevojshme që Shtetet e Bashkuara të dënojnë sulmet izraelite ndaj objekteve bërthamore iraniane nëse duan të vërtetojnë vullnetin e tyre të mirë”, thotë Araghchi, duke shtuar se Teherani nuk i beson deklaratave amerikane se Uashingtoni nuk kishte marrë pjesë në sulmet e fundit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
