Situata alarmante e ndotjes së ajrit në Prishtinë do të mbledhë deputetët e Kosovës në një seancë të posaçme. Kryetari i Kuvendit të Kosovës, Kadri Veseli, ka bërë të ditur se ka iniciuar mbajtjen e një seance të jashtëzakonshme, për marrjen e masave konkrete lidhur me përmirësimin e cilësisë së ajrit në Prishtinë. Veseli thotë se duhet një plan nacional për të shmangur përsëritjen e një situate të tillë.
“I shqetësuar tej mase me cilësinë e ajrit në Prishtinë, kam iniciuar mbajtjen e një seance të jashtëzakonshme të Kuvendit të Kosovës, që të kërkojmë nga të gjitha institucionet ndërmarrjen e masave të menjëhershme konkrete për përmirësimin e kësaj gjendjeje”, ka shkruar Veseli.
Një raport i monitorimit të cilësisë së ajrit, i bërë publik dy ditë më parë, e vendos Prishtinën në krye të listës së qyteteve më të ndotura. Monitorimi i kryer nga Agjencia e Shteteve të Bashkuara për Mbrojtjen e Mjedisit përmes “Indeksit të cilësisë së ajrit” ka nxjerrë se kryeqyteti i Kosovës është i pari në listën e vendeve me ndotjen mbi normat e lejuara.
Bazuar në matjen e bërë nga Qendra për matjen e cilësisë së ajrit e vendosur nga Ambasada Amerikane në Prishtinë, në orën 18:00, vlera e ndotjes ka arritur në 350 dhe konsiderohet e shumë e pashëndetshme,.
Ndërsa prej orës 21:00, ndotja arrin në 431, një nivel akoma me alarmant për shëndetin e qytetarëve të Prishtinës.
Prishtina aktualisht ndodhet në vendin e parë në botë me ajrin e ndotur, duke lënë pas vetes edhe Indinë, Pakistanin, Bangladeshin e vende të tjera që tradicionalisht kanë qëndruar në krye të kësaj liste.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
