Ndryshimet në Kodin Zgjedhor/ Rama nga Gjermania: Opozita të japë alternativa, por ta harrojë se do pengojë procesin

Kryeministri Edi Rama, gjatë një interviste televizive nga Gjermania, ku po zhvillon takim me përfaqësues të Bundestagut, u shpreh se deklaratat e Presidentit Ilir Meta, lidhur me ndryshimet në Kodin Zgjedhor në momentin kur flet janë lidhura me rrotullimin e hënës.

Sipas Ramës, deklaratat e Presidentit influencohen nga dita dhe varet nga kahja e hënës në momentin kur flet. Rama thekson se Kuvendi është legjitim dhe do vijoi punën për implementimin e ndryshimeve të kodit zgjedhor, të diktuara nga ndryshimet kushtetuese të votuara në fund të korrikut.

“Nuk i kam ndjekur deklaratat e presidentit, nuk përbëjnë asnjë surprizë në çfarëdo forme që ato të materializohen, presidenti ka një raport shumë personal me rrotullimin e hënës kështu që varet nga dita dhe varet nga kahja e hënës në momentin kur flet”, u shpreh Rama.

“Ndërkohë që parlamenti vazhdon punën, jo vetëm që është legjitim por është në krye të detyrës e do të vazhdojë të kryejë detyrën për të reflektuar në Kodin Zgjedhor ndryshime të rëndësishme që ndodhën përpara mbylljes së sesionit të kaluar duke i hapur rrugë listave të hapura dhe njëkohësisht duke konsoliduar sistemin zgjedhor me një ndryshim të domosdoshëm të formulës së koalicioneve, nga një formulë absurde e cila ishte krejtësisht unikale dhe të cilën nuk e ka asnjë vend, në një formulë që e kanë të gjitha vendet europiane që kanë koalicionin si një mundësi dhe që krijojnë koalicione parazgjedhore”,- tha Rama.

Sa i përket propozimit të Damian Gjiknurit për listat e hapura në zgjedhjet e 25 prillit, Rama tha se ai i referohet një modeli që e kanë disa vende demokratike që përdorin listat e hapura. Ndërsa nënvizoi se opozita jashtëparlamentare është e mirëpritur që të japë alternativa, por jo të pengojë procesin.

“Uroj që opozita jashtë parlamentit mos të humbasë kohë, se koha nuk pret, votimi i ligjit zgjedhor është vetëm hapja e një procesi, ku më pas duhet të zbatohet. Në ligjin zgjedhor kemi edhe angazhimin për sistemtin e identifikimin elektronik, sa më shumë kohë humbitet aq më pak bëhet e mundur implementimi i këtij sistemi. Edhe njëherë e përsëris, Opozita është e mirëpritur të diskutojë, të japë alternativa, por që të pengojë procesin sikur e ka zakon duhet ta harrojë, ta harrojë një orë e më parë sepse nuk ka kohë për të pritur dhe në nuk do  presim në pafundësi.”