Konflikti institucional mes pushtetit gjyqësor dhe ekzekutivit për pagat e muajit gusht ka arritur pikën kritike. Magjistratët dhe shoqatat e tyre i kanë vendosur një ultimatum zyrtar Ministrisë së Financave, duke i lënë afat deri sot në orën 16:00 për kalimin e pagave në sistemin e Thesarit.
Nëse ky afat shkelet dhe paratë nuk kalojnë drejt bankave të nivelit të dytë, trupa e gjyqtarëve dhe prokurorëve ka paralajmëruar zyrtarisht nisjen e ndjekjes penale ndaj zyrtarëve përgjegjës të Ministrisë dhe Drejtorisë së Thesarit për moszbatim të vendimeve të Gjykatës Kushtetuese.
MCN ka siguruar ekskluzivisht shkresën zyrtare të Prokurorisë së Elbasanit, e cila i është drejtuar Ministrisë së Financave. Në këtë dokument, organet e akuzës kërkojnë me tone të prera dhe pa asnjë vonesë ekzekutimin e menjëhershëm të fondeve për pagat e prapambetura.
Pas vendimit të Këshillit të Lartë Gjyqësor (KLGJ) dhe Këshillit të Lartë të Prokurorisë (KLP), prokuroritë dhe gjykatat e rretheve i janë bashkuar kësaj thirrjeje, duke argumentuar se bllokimi financiar po paralizon funksionimin normal të të gjithë sistemit të drejtësisë në vend.
Bllokimi në Thesar erdhi pasi KLGJ dhe KLP llogaritën pagat e muajit gusht me një formulë të re të rritur (duke e çuar pagën referuese në 222,425 lekë plus shtesat), duke u bazuar në një vendim të Gjykatës Kushtetuese të shkurtit 2026.
Nga ana tjetër, Ministria e Financave pretendon se nuk mund t'i ekzekutojë këto pagesa pa u miratuar më parë ndryshimet ligjore dhe buxhetore nga Parlamenti i Shqipërisë, duke kërkuar që listëpagesat të dorëzohen me metodologjinë e vjetër.
Situata mbetet tejet e tensionuar teksa akrepat e orës po afrojnë drejt afatit të fundit të vendosur nga magjistratët.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
