Ministri i Drejtësisë, Ylli Manjani, ka reaguar në lidhje me deklaratën e djeshme të ambasadorit amerikan, i cili është shprehur se policia dhe drejtësia dështuan në kapjen e Klement Balilit, i njohur ndryshe si Eksobari i Ballkanit.
I pranishëm në punimet e Forumit Ministerial të Ballkanit Perëndimor për Çështjet e Drejtësisë dhe ato të Brendshme, Manjani tha se e mbështet shqetësimin e ambasadorit Lu. Manjani tha se prej 7 muajsh ka shprehur edhe vetë të njëjtin shqetësim dhe shton se Ministria e Drejtësisë e ka bërë detyrën që i cakton ligji në raste të tilla.
“Mbështes plotësisht shqetësimin e shprehur ditën e djeshme nga Ambasadori i Shteteve të Bashkuara të Amerikës, z. Donald Lu në lidhje me mosarrestimin e shtetasit Klement Balilit. Gjej rastin t’ju informoj, se sikurse edhe mund të jeni në dijeni prej 7 muajsh dhe në mënyrë të përsëritur e kam shprehur dhe publikisht këtë shqetësim. Mostrajtimi apo trajtimi i gabuar i kësaj çështjeje nuk mund t’i barazojë institucionet e shtetit në përgjegjësi dhe as të luhet “ping-pongu” i radhës. Ligji shqiptar përcakton qartë se kush arreston, kush ndalon, kush akuzon dhe kush dënon persona të përfshirë në shkeljet e ligjit. Ministri i Drejtësisë vetëm ndihmon me transmetim letër-porosish dhe/ose përkthim zyrtar të dosjeve. Këtë detyrë e kemi bërë në kohë rekord”, tha Manjani.
Ministri i Drejtësisë theksoi se “pingpongu i përgjegjësive është e keqja më e madhe që ka sot sistemi”.
“Prandaj askush të mos fshihet pas alibive të sajuara, por të marrë përgjegjësitë që i jep ligji dhe t’i ushtrojë. Përsëris qëndrimin tim të palëkundur se kushdo që ka shkelur ligjin duhet të ndëshkohet pa dallim”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
