Zjarret në Korenë e Jugut, të paktën 18 të vdekur dhe dhjetëra të plagosur

Të paktën 18 persona kanë humbur jetën dhe 19 janë plagosur pasi zjarret e Koresë së Jugut vazhdojnë të shkatërrojnë juglindjen e vendit, sipas shifrave të fundit nga Ministria e Brendshme dhe Sigurisë.

Kriza "e paprecedentë" mbetet kritike, sipas presidentit në detyrë Han Duck-soo, i cili tha se zjarret po "rishkruajnë librat e rekordeve për zjarret më të këqija në historinë e kombit tonë".

Më shumë se 23,000 njerëz janë evakuuar dhe disa objekte kulturore të trashëgimisë janë prekur, duke përfshirë një tempull budist 1,300-vjeçar që u shkatërrua.

Një helikopter zjarrfikës u rrëzua në malet e qarkut Uiseong pak pas mesditës të së mërkurës, sipas autoriteteve, të cilët po hetojnë shkakun.

Mijëra zjarrfikës dhe rreth 5000 personel ushtarak janë vendosur për të kontrolluar flakët e shumta, si dhe helikopterë nga ushtria amerikane e vendosur në Kore.

Të martën, agjencia kombëtare e zjarrfikësve tha se e kishte ngritur krizën në nivelin më të lartë të reagimit ndaj zjarrit, hera e parë që këtë vit lëshohej një alarm i tillë.

Zjarret e egra janë relativisht të rralla në Korenë e Jugut dhe vdekjet e lidhura me to janë të rralla. Zjarret aktuale, që kanë vrarë 18 persona gjatë ditëve të fundit, janë tashmë më vdekjeprurësit në historinë e vendit.

Rreth 17,000 hektarë pyje janë shkatërruar gjithashtu, duke i bërë zjarret të tretat më të mëdha në historinë e Koresë së Jugut për sa i përket sipërfaqes.

Zjarret e ndezura në qytetin Uiseong dogjën tempullin Gounsa, i ndërtuar në vitin 618 pas Krishtit, i cili ishte një nga tempujt më të mëdhenj në provincë.

Zjarret shpërthyen fillimisht të premten e kaluar në kontenë Sancheong, në juglindje të vendit, por tani janë përhapur në qytetet fqinje të Uiseong, Andong, Cheongsong, Yeongyang dhe Yeongdeok.