Tre deputetë të rinj betohen të enjten në Parlament

Komisioni Qendror i Zgjedhjeve u ka dhënë sot mandatin tre deputetëve të rinj: Ralf Gjoni, Nimet Musai dhe Enada Kociraj.

Të tre deputetët e rinj, janë pjesë e listës së kanidatëve për deputetë të Lëvizjes Socialiste për Integrim. Me këta deputetë, nga kjo forcë politike arrin në 11 numri i deputetëve, nga 18 sa kishte LSI në Parlament.

Megjithëse kryetarja e LSI, Monika Kryemadhi, i është drejtuar zyrtarisht KQZ me kërkesë që mos u japë më mandate deputetëve të rinj si një vendim antikushtetues, një kërkesë e tillë nuk është marrë në konsideratë, pasi Kushtetuta dhe Kodi Zgjedhor e lejojnë një gjë të tillë.

Pos kësaj, janë edhe 18 emrat e rinj, të cilët janë thirrur nga Komisioni Qendror në raundin e tretë për marrjen e mandatit të deputetit. 18 kandidatët kanë 10 ditë afat që të dorëzojnë formularin e vetëdeklarimit.

Pas verifikimit të formularit, në kuadër të ligjit të dekriminalizimit, KQZ do t'u japë mandatin e deputetit për të bërë më tej betimin në seancën plenare të Kuvendit të Shqipërisë.