Një gjimnaste 11-vjeçare ukrainase, Kateryna Dyachenko, mbeti e vrarë nga shemba e shtëpisë së saj, e cila u godit nga një bombë ruse në Mariupol.
Lajmi i trishtë u bë i ditur nga trajnerja e saj Anastasia Meshchanenkova, cituar nga mediat vendase.
Nga sulmi humbi jetën edhe babai i saj, ndërsa nëna dhe vëllai shpëtuan, ndonëse ky i fundit u plagos rëndë. Mirëpo as vëllai dhe as nëna e së ndjerës, nuk mundën të evakuohen nga qyteti dhe janë bllokuar së bashku me mijëra njerëz të tjerë në Mariupol.
Trajnerja e së ndjerës, Anastasia Meshchanenkova, me një postim në Instagram dhe një foto të saj me gjimnasten e vogël, ndau lajmin e hidhur. Fotoja është bërë dhjetorin e kaluar, kur lufta ishte ende larg. Vdekja tragjike e së miturës shkaktoi bujë dhe zemërim në organizatat e gjimnastikës në mbarë botën.
“Nuk mund ta besoj, kolegët tanë ukrainas ndanë këtë tragjedi të tmerrshme. Kjo krijesë e mrekullueshme dhe e butë është tashmë engjëll”, tha gjimnastja bullgare Iliana Raeva, presidente e Federatës Kombëtare të Gjimnastikës Ritmike.
Edhe gjimnastika ritmike zvicerane i bëri homazhe të resë: “Pusho në paqe, Katya! Gjimnastja e re e bukur nga Mariupoli u largua shumë shpejt nga kjo botë. Ajo është një nga viktimat e shumta të një lufte të pakuptimtë”.
Shtëpia e Katerynës u shemb pas një goditjeje direkte nga artileria ruse në Mariupol, qytet që është bombarduar pothuajse vazhdimisht që nga dita e parë e pushtimit ushtarak rus.
Energjia elektrike, uji, ushqimi dhe ngrohja janë ndërprerë për shkak të bombardimeve të vazhdueshme, duke bllokuar të paktën 100.000 njerëz.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
