Xama: Politikanët heqin dorë nga privatësia financiare kur hyjnë në politikë

Gazetarja Ola Xama, e ftuar në emisionin "Të Paekspozuarit", theksoi se hetimi pasuror i politikanëve është një proces i natyrshëm dhe i domosdoshëm, pasi ata me hyrjen në politikë, pranojnë të deklarojnë pasurinë e tyre dhe të hetohen për çdo transaksion financiar.

Sipas saj, ky është një detyrim ligjor që funksionon në shtetin shqiptar dhe kush nuk dëshiron të jetë subjekt i këtyre hetimeve, mund të zgjedhë të mos mbajë poste publike.

“Kemi dëgjuar kohët e fundit reagime edhe nga ekspertë të rëndësishëm të Partisë Socialiste, por edhe nga ata që kanë qenë drejtuesit e komisionit të posaçëm të reformës në drejtësi.

Lidhur me teknikën e hetimeve të prokurorisë së posaçme të orientuar drejt hetimit pasuror dhe jo shkeljeve proceduriale, dua që t'i kujtoj plotësimi i deklaratës së pasurisë vjetore dhe të interesave është një e drejtë, nga e cila politikanët, përpara se t'i hyjnë politikës, heqin dorë dhe ata pranojnë që të deklarojnë sa shtëpi kanë, sa të ardhura kanë, sa blejnë dhe si i shpenzojnë, dhe që të hetohen për këtë. Në momentin që çdo politikan ka marrë detyrën, është shumë i vetëdijshëm që mund të hetohet për pasurinë e tij apriori.

Sepse e ka firmosur vetë në deklaratën e pasurisë dhe ky është ligji që është. Që funksionon në shtetin shqiptar, nëse ata nuk duan që të hetohen për pasurinë e tyre, mund të zgjedhin të mos jenë në politikë apo të kenë poste të zyrtarit të lartë.”