Ish-deputeti Koço Kokëdhima ka uruar presidentin e ri amerikan përmes një postimi në rrjtete sociale. Kokëdhima shprehet se zgjedhja e Trampit është një fitore historike jo vetëm për demokracinë amerikane, por për të gjithë popujt që aspirojnë për një demokraci të vërtetë.
“Asnjëherë më parë nuk ka ndodhur diçka e tillë. Fitorja e z. Trump nuk është thjesht një fitore e të djathtës kundër së majtës, por një fitore e popullit amerikan kundër tërë establishmentit politik. Kjo fitore tejçon anembanë planetit mesazhin e madh popullor për nevojën absolute të përtëritjes së klasave politike. Me Donald Trump-in hynë në Shtëpinë e Bardhë të gjithë ata amerikanë që janë ndjerë të zhgënjyer dhe të përbuzur nga sistemi aktual politik, mediatik e financiar”, shkruan ai.
Kokëdhima shpreh besimin se “marrëdhëniet e Shqipërisë me Amerikën e z.Tramp do të jenë shumë të mira, pavarësisht komenteve të papjekura të disa zyrtarëve e gazetarëve të Tiranës kundër tij”.
“Unë besoj plotësisht se Z.Trump do të jetë mik i popullit shqiptar dhe do ta ndihmojë Shqipërinë në përpjekjet e saj për t’u çliruar nga sistemi politik i kalbur, që po e atrofizon e po e vret popullin shqiptar, duke i hequr atij çdo mundësi reagimi dhe çdo aftësi për të përmirësuar jetën e vet. Shpresoj shumë që Z. Trump të çlirojë diplomacinë ndërkombëtare për Shqipërinë nga ndikimi i Sorosit. Kjo do të na shpëtojë ne nga nevoja e këtij fondacioni për të kontrolluar zhvillimet politike dhe për ta mbajtur Shqipërinë nën një sistem pseudodemokratik”, shkruan ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
