Në Greqi po diskutohet një projektligj i ri që parashikon ndryshime në procedurat e azilit. Qeveria greke ka hartuar një draft të ri, ndërkohë që kanë nisur përpjekjet për krijimin e hapësirave të reja për strehimin e emigrantëve, duke i zhvendosur një pjesë të tyre nga ishujt në kontinent.
Ministri i Mbrojtjes së Qytetarëve, Mihalis Krisokoidis, kryesoi të premten një takim të jashtëzakonshëm me 13 guvernatorët rajonalë të vendit, të cilëve u kërkoi të mbajnë një pjesë të barrës, në mënyrë që mijëra migrantë të mund të zhvendosen gradualisht nga kampe të mbipopulluara të rrezikshme në ishujt e Egjeut lindor.
Sipas Krisokoidis, nuk ka plane për të krijuar kampe më të mëdha. Por në vend të kësaj, autoriteteve rajonale u kërkohet të zgjerojnë objektet ekzistuese ose të marrin me qira përkohësisht hotele.
Ndërkohë projektligji i ri - që synon forcimin e procedurës së azilit për të siguruar që nuk ka hapësira për abuzim dhe që aplikimet e refuzuara nuk do të duhet të rishikohen - do të diskutohet në mbledhjen e kabinetit të hënën.
Në një fjalim në Asamblenë e Përgjithshme të Kombeve të Bashkuara në Nju-Jork, Mitsotakis bëri thirrje për ndarje më të barabartë të barrës së emigrantëve, duke lënë të kuptohet se disa shtete të Evropës Qendrore dhe Lindore kanë dështuar në pranimin e azilkërkuesve.
"Ne po arrijmë kufijtë e kapacitetit tonë për t’u përballur me këtë problem”, tha ai.
"Greqia nuk mund të mbajë e vetme barrën e lëvizjeve masive të njerëzve," tha ai ndërsa foli për një "sfidë evropiane që kërkon veprime evropiane".
Kryeministri Grek gjithashtu i kërkoi Turqisë që të respektojë një marrëveshje me BE për të ndaluar flukset e emigracionit të paligjshëm. Ai i kërkoi BE-së të përshpejtojë përpjekjet për të miratuar rregulla të reja të përbashkëta për azilkërkuesit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
