Pavarësisht kundërshtimit dhe rezistencës së artisëve dhe shoqërisë civile prej më shumë se dy vitesh, Teatri Kombëtar është kthyer sot në një grumbull rrënojash. Pas shembjes në orët e para të mëngjesit, me ndihmën e qindra forcave policore, fadromat po punojnë për largimin e inerteve. Shembja ka ngritur një re pluhuri që ka mbuluar zonën.
Ndërkohë, përreth vijojnë përplasjet protestuesve me policinë, e cila ka krijuar një perimetër sigurie, përtej të cilit nuk mund të kalohet. Dy vjet protesta paqësore dhe rezistencë me gjuhën e artit janë injoruar nga qeveria dhe Bashkia e Tiranës, e cila vetëm pak ditë pas kalimit të objektit në pronësi të saj, rrënoi një prej monumenteve të trashëgimisë kulturore dhe asaj historike të kryeqytetit.
Përgjatë dy viteve, Teatri u kthye në një simbol të rezistencës qytetare dhe solidaritetit. Pas tërmetit të 26 nëntorit ishin me mijëra qytetarët që ia besuan Teatrit ndihmën për familjet e dëmtuara. Kauza e artistëve gjeti mbështetje të gjerë brenda dhe jashtë vendit, por pavarësisht kësaj, Teatri i ndërtuar në vitin 1938, që ka parë të rriten breza të tërë artistësh, u rrënua pabesisht natën.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
