Vijon situate emergjente e përmbytjeve në rajonin e Emilia Romagna-s në Itali, ku shirat e pandërperë kanë sjellë përmbytje dhe rrëshqitje të vazhdueshme të dherave, duke gjunjëzuar qytete të tëra.
Numri i personave të zhvendosur rritet në më shumë se 36,600, shumica e tyre në zonën e Ravenës. “Ansa” raporton se një helikopter që po kontrollonte linjat e energjisë është rrëzuar, e për pasojë janë plagosur 4 persona, 2 prej të cilëve në gjendje të rëndë.
Kryeministria Giorgia Meloni ka lënë takimin G7-ës që po mbahet në Hiroshima për t’u nisur me avion drejt vendit të saj. “Ndërgjegjia ime kërkon që të kthehem”, citohet të ketë dhënë shefja e ekzekutivit italian.
Meloni do të jetë në Emilia Romagna, ku rreth mesditës do të inspektojë nga afër zonat e prekura nga moti i keq. Presidenti i rajonit Stefano Bonaccini dha mesazhe optimiste, duke u shprehur se “më në fund ka dalë dielli dhe situata po përmirësohet”. Megjithatë ai shtoi se: “Kemi ende disa zona, veçanërisht në zonën e Ravenës, ato më të ulëta, të cilat janë të përmbytura”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
