“Xhadat" - 40 fëmijë në një furgon, "cirku" i përditshëm i nxënësve të kryeqytetit

Transporti i nxënsësvë është një problem i cili nuk prek vetëm zonat e thella por edhe qendrat urbane.

Emisioni“ Xhadat” bëri një vëzhgim në disa prej shkollave të kryeqytetit për të parë  nëse mjetet e transportit shkollor zbatojnë rregullat e përcaktuara  për transportin rrugor të nxënësve.

Nga vëzhgimi ynë na rezulton se shumë drejtues mjetesh të kësaj kategorie transportonin nxënës më shumë se kapaciteti i lejuar.

Furgonat që kamera jonë filmoi në terren janë Sprinter dhe maksimumi i kapacitetit të tyre është 28 vende. Ndërsa ne shohim të zbresin 30 dhe 38 nxënës nga një furgon.

Furgonat nuk kanë ngjyrën portokalli si e parashikon vendimi ndërkohë që nxënësit zbresin nga furgoni të pa shoqëruar nga askush.

Sipas drejtoreshës së shkollës “Vasil Shanto” nuk është roli i shkollës të merret me problemin e transportit të nxënësve.

“Mos ia kërko shkollës këtë. Menaxhimin e rrugës e bën Bashkia nuk e bën shkolla. Me furgonat që bëjnë transportin e shkollave, nuk kemi lidhje. Në mënyrë apsolute, është mardhënie  private. Të gjitha,i gjejnë vetë prindrit, shkolla s’ka lidhje fare. Ardhja dhe largimi është përgjegjsi e prindërve dhe mardhënia midis furgonit apo mjetit që bën transportin e nxënësve  është gjithmonë një mardhënie private. Në mënyre apsolute është përgjegjësia prindërore”

Lidhur me këtë problem nëpërmjet komunikimit elektronik  u shpreh edhe Ministria e Arsimit dhe Sportit e cila thotë se : 

“Në qendrat urbane transporti i nxënësve dhe mësuesve për në institucionet arsimore bëhet nëpërmjet rrjetit të linjave të transportit publik/privat të miratuara nga organet e vetëqeverisjes vendore apo qendrore, apo me mjete të familjarëve ose të pajtuara nga ana e familjarëve.

Institucionet dhe strukturat arsimore nuk e kanë në fushën e vet të veprimtarisë kontrollin, mbikëqyrjen apo zbatimin e kërkesave ligjore të mjeteve të licencuara të transportit publik për oraret, kapacitet apo gjendjen e tyre teknike.

Emisioni investigativ  “Xhadat” u interesua edhe pranë Komisariatit Rajonal të  Policisë Rrugore Tiranë. Për të mësuar më shumë mbi kundravajtjet administrative dhe problematikat që hasen në transportin shkollor.

Specialistja e pranë Komisariatit Rajonal të Policisë  Rrugore, Tiranë  znj. Fatime Zela shprehet se:

“Një nga problemet më kryesore që hasen  në qarkullimin rrugor, për transportin e fëmijëve, është transporti mbi kapacitetin e lejuar  që do të thotë  se në mjet futen më shumë  pasagjerë se ç’është e lejuar në çertifikatën e transportit, librezën.

Probleme të tjera që hasim janë edhe problemet e fiksimit  të fëmijëve, gjë të cilën nuk janë të paisur të gjithë me fiksimin  e fëmijëve, çertifikatën e transportit për fëmijë  dhe lejen e drejtimit, të drejtuesit të mjetit  që të jetë e specifikuar për trasportin e fëmijëve. Nga qarkullimi rrugor  janë marrë masa për këtë kategori  mjetesh, janë marrë masa për pezullimin e lejeve të drejtimit, për këtë kategori  mjetesh. Përsa i përket  qarkullimit rrugor kontrollet më të shumta janë në orarin e fillimit dhe të mbarimit të mësimit, për shkak të fluksit të nxënësve.Gjatë gjithë kohës pranë një shkolle  në buzë të rrugës gjithmomë është pozicionuar  një polic qarkullimi qoftë për mbarvajten e trafikut, por edhe për sigurinë  nxënësve për të kaluar nga njëra anë e rrugës,  në krahun tjetër të rrugës”.

Masat me sa duket i merr vetëm policia për kundravajtësit, por duhet të funksionojnë të gjitha hallkat, bashkia, ministria, shkolla dhe famila,  ndryshe do kemi përherë këtë gjendje me transportin shkollor të nxënësve.