Sekretari amerikan i Shtetit Anthony Blinken ka kundërshtuar idenë e presidentit të zgjedhur amerikan, Donald Trump, që Grenlanda të vihet nën kontrollin e Shteteve të Bashkuara, ide e cila ka ngjallur reagime dhe në mesin e liderëve evropianë.
Trump përforcoi ambicien e tij gjatë kësaj jave duke thënë se dëshiron që territori gjysmautonom i Danimarkës të vihet nën kontrollin e Shteteve të Bashkuara sepse, sipas tij Grenlanda i nevojitet SHBA-së për qëllime të sigurisë kombëtare.
Megjithatë, sekretari i Shtetit, Antony Blinken, tha se qëllimet e presidentit të ri amerikan janë vetëm fjalë.
Ideja e shprehur për Grenlandën nuk është e mirë, natyrisht. Mbase më e rëndësishme është sigurisht ideja se kjo nuk do të ndodhë. Prandaj, ne nuk duhet të humbim kohë duke folur për këtë temë.
Në lidhje me idenë e Trump ka folur edhe Ministri i Jashtëm i Francës, Jean-Noel Barrot, që gjithashtu hodhi poshtë mundësinë që forcat amerikane të vendosen kundër Danimarkës, e cila është aleate e SHBA-së në aleancën ushtarake të NATO-s, por tha gjithashtu se Evropa duhet të përgatitet për një periudhë turbulencash në të ardhmen.
Vetë kryeministrja e Danimarkës, Mette Frederiksen, ka thënë se nuk beson se Shtetet e Bashkuara do ta përdorin fuqinë ushtarake ose ekonomike për ta marrë kontrollin mbi Grenlandën dhe i ka bërë thirrje SHBA-së të ketë sjellje më “respektuese ndaj popullit të Grenlandës”.
Grenlanda, e cila është pjesë e NATO-s përmes anëtarësisë së Danimarkës, ka një rëndësi strategjike për ushtrinë amerikane dhe për sistemin e saj të paralajmërimit të hershëm për raketat balistike, pasi rruga më e shkurtër nga Evropa për në Amerikën e Veriut kalon përmes ishullit Arktik.
Ushtria amerikane ka një prani të përhershme në bazën ajrore, Pituffik, në veriperëndim të Grenlandës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
