U qëlluan me armë zjarri, ndërrojnë jetë në spital dy të plagosurit në Velipojë

Dy persona kanë ndërruar jetë pasi u plagosën më herët gjatë mbrëmjes së sotme me armë zjarri në Velipojë.

Ngjarja ka ndodhur, rreth orës 21:00, në Velipojë, ku dyshohet se për motive të dobëta, dy vëllezërit E.F., dhe G. F., dyshohet  se kanë plagosur me armë zjarri shtetasit e identifikuar si Arsid Hoxha dhe Ersild Ishmi.

Menjëherë pas ngjarjes të plagosurit janë transportuar me urgjencë për ndihmë mjekësore në Spitalin Rajonal të Shkodër, por si pasojë e plagëve të marra humbën jetën në spital.

Dyshohet se mes autorëve dhe dy viktimave ka pasur një konflikt para disa javësh. Ndërkohë mbrëmjen e sotme ata janë takuar në një lokal ku edhe më pas ka ndodhur ngjarja.

Me marrjen e njoftimit, kanë shkuar menjëherë në vendngjarje, shërbimet e Drejtorisë Vendore të Policisë Shkodër, Drejtuesit e Drejtorisë dhe të Komisariatit të Policisë Shkodër, si grupe të Forcës Kombëtare të Sigurisë, Njësia Shkodër.

Njëkohësisht është ngritur një grup i posaçëm hetimor i cili ndodhet në vendngjarje dhe po vijon punën intensive në bashkëpunim me Prokurorinë për sigurimin e provave me qëllim dokumentimin ligjor të kësaj ngjarjeje.