Djali i diktatorit të ndjerë libian Moammar Gaddafi do të kandidojë në zgjedhjet presidenciale të muajin e ardhshëm. Sipas agjencisë zgjedhore të Libisë, Seifal-Islam Gaddafi dorëzoi dokumentet e tij të kandidaturës në qytetin jugor Sabah.
Në vitin 2011, djali i Gaddafit, u kap nga luftëtarët pas një kryengritje popullore që rrëzoi babanë e tij nga pushteti pas mbi 40 vjet në pushtet. Më vonë, Moammar Gaddafi u vra ndërsa zhvilloheshin luftime që u kthyen në një luftë civile.
Seifal-Islam Gaddafi u lirua nga burgu në Qershor të vitit 2017 pas më shumë se pesë vitesh. Atëherë ai i tha gazetës “New York Times” se po shqyrtonte mundësinë e kandidimit për president.
Gjatë dorëzimit të kandidaturës së tij, Seifal-Islam Gaddafi tha se “Zoti do të vendosë se cila është rruga e duhur për të ardhmen e vendit”.
Ai kishte veshur një mantel tradicional libian, çallmë dhe syze.
Libia do të mbajë zgjedhjet presidenciale më 24 Dhjetor, pas disa vitesh përpjekjesh të udhëhequra nga Organizata e Kombeve të Bashkuara për të siguruar një të ardhme më demokratike dhe për t’i dhënë fund luftës.
Votimi i shumëpritur përballet ende me sfida përfshirë përçarjen e thellë që mbetet midis lindjes dhe perëndimit të vendit, të ndarë prej vitesh nga lufta dhe prania e mijëra luftëtarëve dhe trupave të huaja.
Diktatori Gaddafi kishte tetë fëmijë, shumica e të cilëve luajtën role të rëndësishme në regjimin e tij.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
