Deputetja e LSI-së, Erisa Xhixho ka shkruar në rrjetin social Facebook se shqiptarëve nuk u del të bëjnë pushime në këtë sezon, madje as një javë të vetme.
Xhixho shkruan në statusin e saj se për shumicën e shqiptarëve, pushimet këtë vit janë luks për shkak të barrës së rëndë të çmimeve, që sa vijnë e rriten me bekimin e Bord i Transparencës, që në fakt është bordi i zhvatjes.
Shqiptarëve nuk u del të bëjnë pushime në këtë sezon, madje as një javë të vetme! Barometri i Ballkanit për vitin 2022 tregoi se 60% e shqiptarëve të anketuar kanë pohuar se nuk mund të përballojnë shpenzimet për një javë pushime në vit.
Kjo ishte përqindja më e lartë në rajon. Për shumicën e shqiptarëve, pushimet këtë vit janë luks për shkak të barrës së rëndë të çmimeve, që sa vijnë e rriten me bekimin e Bord i Transparencës, që në fakt është bordi i zhvatjes.
Për shumicën e shqiptarëve, bregdeti është sivjet mollë e ndaluar për shkak të çmimit të naftës që pëson rritje progresive, ndërsa qeveria injoron propozimet për lehtësimin e taksës së qarkullimit dhe asaj të karbonit.
Qytetarët shqiptarë maten mirë edhe kur llogarisin kostot e jetesës, pasi 50% e të ardhurave të tyre shkojnë për ushqim, ndërsa paralelisht përmes taksave paguajnë për inceneratorët fantazmë dhe PPP-të që qeveria u jep klientëve të vet.
Ndërkohë, rritja e çmimeve e pasuroi qeverinë me 342 milionë euro vetëm gjatë pesë muajve të parë të këtij viti. Laku i çmimeve të ngritura në qiell dhe haraçi i inceneratorëve janë e vërteta e kësaj qeverisjeje, që mban nën thundrën e varfërisë qytetarët !
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
