Andrew Tate arrestohet sërish për ngacmim seksual

Influencuesi Andrew Tate është arrestuar sërish në Rumani, me një urdhër arresti të lëshuar nga autoritetet britanike.

Një lajm i tillë u raportua nga zëdhënësja e saj, Mateea Petrescu, duke shpjeguar se 37-vjeçari Andrew Tate dhe vëllai i tij Tristan Tate u arrestuan mbrëmjen e së hënës me akuzën e ngacmimit seksual në një rast të ndodhur në Britani që daton në vitet 2012-2015.

Gjithashtu sipas asaj që raportoi zëdhënësja, Gjykata e Apelit të Bukureshtit do të marrë sot një vendim për ekzekutimin e urdhër-arresteve të lëshuara nga Gjykata e Magjistraturës Westminster në Mbretërinë e Bashkuar.

Tate akuzohet edhe në një çështje të veçantë në Rumani, ku përballet me akuzat për përdhunim, trafikim njerëzor dhe formimin e një bande kriminale për shfrytëzimin e grave.

Si pjesë e këtij rasti ai u arrestua pranë Bukureshtit në dhjetor 2022 së bashku me vëllain e tij Tristan dhe dy gra rumune. Prokurorët rumunë i paditën zyrtarisht të katër në qershor 2023, por ata i mohuan akuzat.

Pasi ishte në burg, Tate u vendos në arrest shtëpie dhe më pas në gusht 2023 fitoi një apel, duke u liruar nga arresti i shtëpisë në pritje të gjyqit.

Katër gra e kishin denoncuar Tate tek autoritetet britanike për sulme seksuale dhe abuzime fizike të dyshuara, por Shërbimi i Prokurorisë së Kurorës britanike vendosi të mos e ndiqte penalisht atë.

Viktimat e dyshuara filluan më pas grumbullimin e financimit për të mbuluar kostot ligjore që do të pësonin në një padi civile kundër Tate.

“Ne dhamë dëshmitë tona për aktet e tmerrshme të dhunës që pësuam dhe pritëm që të merrej masa. Por 4 vjet më vonë na u tha se autoritetet e Mbretërisë së Bashkuar nuk do ta ndiqnin penalisht”, thonë gratë në faqen e tyre të fushatës.

Është e vetmja mënyrë që na ka mbetur për të siguruar që ai të mbahet përgjegjës për veprimet e tij.

Në lidhje me çështjen ndaj tij në Rumani, Andrew Tate, i cili ka grumbulluar 8.7 milionë ndjekës në rrjetin social, e hesht.

Ai ishte ndaluar më parë nga disa platforma të njohura të mediave sociale për shprehjen e pikëpamjeve mizogjene dhe nxitjen e urrejtjes.

Pas arrestimit të tyre në Rumani, vëllezërit Tate u mbajtën për 3 muaj nga policia përpara se të transferoheshin në arrest shtëpie, pas lirimit të tyre iu ndalua qëndrimi në zonat e komunës së Bukureshtit dhe qarkut fqinj të Ilfov.

Në janar, Tate fitoi një apel kundër sekuestrimit të aseteve të tij nga autoritetet rumune, të cilat u konfiskuan pas arrestimit të tij, 15 makina luksoze, 14 orë luksi dhe para kesh në monedha të ndryshme me një vlerë të vlerësuar prej 3.6 milionë euro.