Ekonomia e Kinës ka shënuar rënie në çerekun e fundit të vitit 2018, duke nxitur shqetësime për ndikimin që mund të ketë ky rezultat në ekonominë globale.
Sipas të dhënave zyrtare, në tre muajt e fundit të vitit të kaluar, ekonomia është rritur për 6.4 për qind në krahasim me 6.5 për qind sa ka qenë në çerekun e tretë.
Statistikat kanë treguar se gjatë gjithë 2018-s, ekonomia e Kinës është rritur në 6.6 për qind, njëherësh shifra më e ulët nga viti 1990.
Këto të dhëna kanë qenë të përafërta me parashikimet, megjithatë ato kanë theksuar shqetësimet e fundit për ulje të rritjes ekonomike në ekonominë e dytë më të madhe në botë.
Këto të dhëna kanë rritur shqetësimet edhe për ndikimin që mund të kenë në ekonominë globale, derisa lufta tregtare me Shtetet e Bashkuara është konsideruar t’i ketë kontribuuar kësaj situate, raporton REL.
Më herët gjatë këtij muaji, kompania Apple ka paralajmëruar se ulja e rritjes ekonomike në Kinë mund të ndikojë në shitjet e saj.
Ndërkohë kompanitë e prodhimit të makinave dhe ndërmarrje tjera kanë folur hapur për ndikimin që ka në to lufta tregtare me SHBA-në.
Presidenti amerikan, Donald Trump ka rritur tarifat në disa produkte kineze, duke i arsyetuar këto masa me siç ka thënë “praktika të padrejta tregtare”, të Kinës ndaj SHBA-së.
Edhe autoritetet kineze kanë vepruar njësoj, duke ngritur shqetësime për luftë tregare midis dy vendeve me ekonomitë më të fuqishme në botë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
