Protestat në Kazakistan, shkon në 225 numri i viktimave

Trazirat e dhunshme në Kazakistan që filluan me protesta paqësore në fillim të janarit kanë lënë të vdekur 225 persona, kanë thënë autoritetet.

"Gjatë gjendjes së jashtëzakonshme, trupat e 225 personave u dorëzuan në morgje, nga të cilët 19 ishin oficerë dhe personel ushtarak," tha në një konferencë të shtunën Serik Shalabayev, kreu i ndjekjes penale në zyrën e prokurorit.

Të tjerët ishin “banditë të armatosur që morën pjesë në sulme terroriste”, shtoi Shalabayev. “Për fat të keq, edhe civilët janë bërë viktima të akteve të terrorizmit”.

Përplasjet e paprecedentë midis forcave të sigurisë dhe protestuesve antiqeveritar e shtynë presidentin, Kassym-Jomart Tokayev, të shpallte gjendjen e jashtëzakonshme dhe të thërriste ndihmë nga një bllok ushtarak i udhëhequr nga Rusia .

Shalabayev tha se 50,000 njerëz iu bashkuan trazirave në të gjithë vendin në kulmin e tyre më 5 janar, kur turmat sulmuan dhe dogjën ndërtesat qeveritare, makinat, bankat dhe dyqanet në disa qytete të mëdha.

Kazakistani kishte deklaruar më parë më pak se 50 viktima – 26 “kriminelë të armatosur” dhe 18 oficerë sigurie – nga një konflikt që ekspozoi përleshjet e brendshme në krye të qeverisë. Një numër më i madh i vdekjeve prej 164 u shfaq në një kanal zyrtar Telegram javën e kaluar, por u fshi shpejt.

Asel Artakshinova, një zëdhënëse e ministrisë së shëndetësisë, tha se më shumë se 2,600 njerëz kishin kërkuar trajtim në spitale, ndërsa 67 janë në gjendje të rëndë.