Dy ujqër të rrallë, të zinj, u kapën nga kamera duke kaluar një përrua në një pyll polak, njoftoi të dielën një organizatë për ruajtjen e faunës së egër.
Pamjet e pazakonta, të regjistruara vitin e kaluar nga një kamera e vendosur nga koordinatorja e projektit të “SAVE Wildlife Conservation Fund” në Poloni, Joanna Toczydłowska, kanë nxitur organizatën të mbledhë mostra nga pylli me shpresën për të studiuar gjenetikën e ujqërve të zinj.
“Kjo është diçka e re dhe e rrallë,” tha Toczydłowska për Associated Press.
Fillimisht, ajo kishte vendosur kamerën për të studiuar kastorët, por kur vuri re se kishte regjistruar ujqër, vendosi ta mbante aty. Disa javë më parë, ajo arriti të dokumentonte ujqër të zinj në filmimet e reja.
Në një nga klipet, një ujk i zi dhe një ujk gri kalojnë ngadalë përroin. Një tjetër klip, i filmuar vjeshtën e kaluar, tregon dy ujqër të zinj dhe një ujk gri duke kaluar të njëjtin përrua.
Në Poloni jetojnë rreth 2,500 deri në 3,000 ujqër, shumica prej tyre me lesh gri me nuanca të kuqe ose të zeza. Ngjyra e zezë e leshit vjen nga një mutacion gjenetik, i cili ka të ngjarë të ketë kaluar te ujqërit nga qentë e zbutur mijëra vjet më parë. Për shkak të diversitetit të kufizuar gjenetik, ujqërit me këtë mutacion janë të rrallë në Evropë, ndryshe nga Parku Kombëtar Yellowstone në SHBA, ku të paktën gjysma e popullsisë së ujqërve ka lesh të zi.
Duke qenë se ujqërit zakonisht lëvizin në grupe familjare dhe dy ujqërit e zinj peshonin rreth 30 kilogramë, Toczydłowska vlerëson se ata janë vëlla e motër, rreth njëvjeçarë. Të paktën njëri prej tyre është mashkull.
Organizata, e cila monitoron ujqërit në Poloni prej 13 vitesh, nuk e ka bërë publike vendndodhjen e saktë të pyllit për të mbrojtur kafshët nga gjuetia e paligjshme dhe për të parandaluar keqinformimin rreth ujqërve.
Popullsia e ujqërve në Poloni kishte rënë ndjeshëm në vitet 1950, por në dekadat e fundit është rikthyer, veçanërisht në qendër të vendit që nga fillimi i viteve 2000. Toczydłowska dhe kolegët e saj punojnë për të edukuar publikun mbi bashkëjetesën e sigurt me tufat e ujqërve.
Javën e kaluar, “SAVE Wildlife Conservation Fund” publikoi pamjet në Facebook dhe bëri thirrje për mbështetje financiare për të mundësuar testimin gjenetik të mostrave të mbledhura, me qëllim studimin e mutacionit të leshit të zi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
