Zëdhënësi i Presidentit, Tedi Blushi, iu përgjigj akuzave që kryetari i Partisë Demokratike, Lulzim Basha, ka hedhur ndaj Metës-Berishës-Ramës.
“Keqardhje që Lulzim Basha vazhdon të përfshijë Presidentin e Republikës, Ilir Meta, në krizat që ai vetë i shpik pa u lodhur”.
Blushi, duke iu referuar fjalës së Bashës, i cili nga foltorja e Kuvendit më 28 tetor, i cilësoi Ramën, Metën e Berishën, se janë si “trekëndëshi i Bermudave”, nëpërmjet një postimi në rrjete sociale, i “kundërvihet” kryedemokratit, duke i sjellë në vëmendje: “Bojkotin e reformës administrative-territoriale”, “Bojkotin e reformës në drejtësi”, “Djegien e mandateve të deputetëve” dhe “Zërimin e opozitës në pushtetin vendor”.
Këto të fundit, Blushi i cilësoi si “katërkëndësh”, që sollën kapjen totale të shtetit.
“Kur Basha të takohet me presidentin Meta do ta pranojë përfundimisht që 7 herë 7 bëjnë 49, as 42 apo 99”, vijon Blushi, duke i bërë kështu thirrje për t’u takuar me Metën, në zyrën e këtij të fundit.
“Presidenti i Republikës vazhdon të ketë vullnetin ta mirëpresë Bashën, për çdo sqarim apo paqartësi, në zyrën e tij në Institucionin e Presidentit, ku gjithmonë është mirëpritur, sa herë ka kërkuar takime dhe ndihmë për të dalë nga bojkotet dhe krizat, që i shpikte vetë”.
Në përfundim, Blushi thekson faktin se, “nuk besoj se ka demokrat dhe shqiptar, që beson se Presidenti Meta u ikën përgjegjësive dhe ballafaqimeve për çështje të rëndësishme të demokracisë dhe shtetit të së drejtës”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
