Ish-prokurorja e Përgjithshme, Ina Rama, mbetet jashtë sistemit të drejtësisë. Në një nga mbledhjet e ditëve të fundit, KLD-ja ka refuzuar të propozojë emërimin e saj në Gjykatën e Apelit Tiranë.
Këshilli ka lënë pa zbatuar një vendim gjykate të formës së prerë që e detyronte të propozonte emërimin e ish-kryeprokurores në Apel, raporton “Panorama”. Bëhet fjalë për vendimin e Apelit Administrativ, të 26 tetorit 2015. Në dispozitat e vendimit, Apeli përcaktonte ndër të tjera “detyrimin e Këshillit të Lartë të Drejtësisë t’i propozojë Presidentit të Republikës emërimin e paditëses Ina Rama në detyrën e gjyqtares së Gjykatës së Apelit Tiranë”. Kjo nuk ka ndodhur në mbledhjen e 4 nëntorit 2016 të KLD-së, mbledhje gjatë së cilës janë plotësuar gjashtë vende vakante në Apelin e Tiranës.
Sipas procesverbalit të mbledhjes, ka qenë anë tari Neritan Cena ai që ka këmbëngulur në zbatimin e vendimit të Apelit Administrativ, duke theksuar se në të kundërt, vendoset një precedent shumë negativ. Emri i ish-kryeprokurores Rama është futur në votim, por nuk ka mundur të marrë votat e nevojshme. Ajo është votuar vetëm nga dy anëtarë. Ky vendim i KLD-së e lë Ramën jashtë sistemit gjyqësor për një periudhë të pacaktuar, në një kohë që KLD është në prag të shkrirjes, për shkak të hyrjes në fuqi të ligjit “Për statusin e gjyqtarit”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
