27 Janari, Dita Ndërkombëtare e Përkujtimit të Holokaustit

Më 27 janar shënohet Dita Ndërkombëtare e Përkujtimit të Holokaustit, e shpallur nga Asambleja e Përgjithshme e Kombeve të Bashkuara në vitin 2005. 

Në këtë ditë përkujtohen viktimat e Holokaustit. Kjo datë përkon me çlirimin e kampit nazist të përqendrimit Auschwitz-Birkenau, më 27 janar 1945.

Fjala “Holokaust” vjen nga greqishtja e lashtë dhe do të thotë “sakrificë e djegur”. Para Luftës së Dytë Botërore, ky term përdorej për të përshkruar vdekjen e një numri të madh njerëzish.

Pas vitit 1945, termi “Holokaust” u bë sinonim i përndjekjes sistematike të hebrenjve evropianë dhe i vrasjes së rreth 6 milionë prej tyre gjatë Luftës së Dytë Botërore, nga nazistët dhe aleatët e tyre, në periudhën 1933–1945. 

Hebrenjtë kësaj ngjarjeje i referohen me fjalën “Shoah”, që do të thotë “katastrofë”.

Një rol të rëndësishëm në shpëtimin e hebrenjve kanë luajtur edhe shqiptarët, të cilët strehuan në familjet e tyre shumë hebrenj që kishin ikur nga vende të tjera, apo që jetonin në Kosovë dhe Shqipëri.