PD mbështet Metën në kallëzimin penal ndaj Dvoranit

Partia Demokratike mbështet kallëzimin penal të Presidentit Meta ndaj kreut të KED-së, Ardian Dvorani.

Përmes një deklarate për shtyp, sekretari i Përgjithshëm në selinë blu, Gazment Bardhi, e ka konsideruar si akt të duhur në mbrojtje të Kushtetutës dhe integritetit të Gjykatës Kushtetuese kalëzimin e kreut të shtetit.

“Kallëzimi penal i Presidentit të Republikës ndaj Kryetarit të KED është akti i duhur në mbrojtje të Kushtetutës dhe integritetit të Gjykatës Kushtetuese. Me veprimet e tij në shërbim të partisë në pushtet, Ardian Dvorani ka minuar ligjshmërinë dhe besueshmërinë e Gjykatës Kushtetuese. Partia Demokratike beson se një hetim i shpejtë, i plotë dhe i pavarur i shkeljeve të ligjit nga Ardian Dvorani, është një gur themeli për rikthimin e besimit tek drejtësia”, thuhet në deklaratë.

PD-ja thekson se do të jetë hapi që do të ndërmarrë prokuroria ai që do të përcaktojë nëse shqiptarët duhet të besojnë akoma te reforma në drejtësi.