Një zjarr i fuqishëm ka përfshirë dhe shkatërruar plotësisht një restorant turistik në Theth në orët e para të mëngjesit të sotëm, duke shkaktuar dëme të mëdha materiale. Ngjarja ka ndodhur rreth orës 02:00, kur flakët kanë shpërthyer në ndërtesën e sapondërtuar në pronësi të familjes Gjeçaj.
Pavarësisht përpjekjeve të banorëve të zonës për të ndalur përhapjen e flakëve, zjarri ka shkrumbuar të gjithë strukturën, e cila sipas pronarëve, ishte ndërtuar me materiale ekologjike dhe kishte një vlerë investimi prej rreth 150 mijë eurosh.
Pronarja e restorantit, Aida Gjeçaj, përjashton mundësinë e një defekti elektrik si shkak i zjarrit, duke u mbështetur në vlerësimet paraprake të ekspertëve të energjisë. “Energjia nuk është ndërprerë edhe pse godina ishte në flakë, çka përjashton shkëndijën elektrike,” tha ajo për mediat.
Edhe pse ende nuk ka prova konkrete, Gjeçaj ngre dyshime se zjarri mund të jetë i qëllimshëm. Ajo thotë se nuk ka pasur konflikte me persona të tjerë dhe as nuk ka qenë objekt i ndonjë procedure ligjore. “Kam zgjedhur gjithmonë të punoj në mënyrë të ndershme, me leje dhe transparencë të plotë. Nuk e di ku ta vë gishtin për këtë që ndodhi,” u shpreh ajo e prekur.
Restoranti, një ndër të parët në zonë që promovoi turizmin e qëndrueshëm në Theth, kishte një histori mbi 15-vjeçare në shërbim të vizitorëve vendas dhe të huaj. Aida Gjeçaj thotë se kjo humbje përveçse materiale, është edhe një goditje morale për të dhe familjen e saj.
Në fund, ajo bën thirrje për një hetim të thelluar nga autoritetet kompetente për të zbardhur të vërtetën. “Besojmë në drejtësi. Dëmet janë materiale, por zhgënjimi është i thellë,” përfundoi ajo. Policia dhe shërbimi zjarrfikës kanë nisur hetimet për zbardhjen e shkaqeve të ngjarjes.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
