“Antishpifja” shkon në Kuvend, protestojnë një pjesë e gazetarëve (VIDEO)

Pasi mori dritën jeshile në Komisionin e Ligjeve, paketa antishpifje kalon sot për miratim në seancën plenare.

Paketa e re është kundërshtuar nga një përfaqësi e gazetarëve, të cilët e konsiderojnë të panevojshëm një kuadër të tillë ligjor dhe shprehen për vetërregullimin e medias.

Në tryezat e ditëve të fundit, në të cilat kanë marrë pjesë përfaqësues të medias dhe të opozitës, paketa antishpifje është cilësuar si një përpjekje e qeverisë për të censuruar fjalën e lirë.

Një grup gazetarësh, aktivistësh dhe përfaqësues të opozitës, do të zhvillojnë sot një protestë kundër paketës anti-shpifje, pak para nisjes së seancës ku pritet të miratohet ligji i ri.

Një ditë më parë, kreu i grupit parlamentar socialist, Taulant Balla, ftoi deputetët të mbështesin miratimin e kësaj pakete.