Emmanuel Macron i ulur mbi pirgje plehrash është fotoja që po përdoret masivisht në protestat e ditëve të fundit në Francë. Imazhi i referohet mbeturinave që nuk mblidhen, pasi punonjësit e kanalizimeve janë në grevë, por reflekton edhe atë që shumë francezë mendojnë për udhëheqësin e tyre.
Macron, 45 vjeç, kishte shpresuar se shtytja e tij për të rritur moshën e pensionit nga 62 në 64 do të çimentonte trashëgiminë e tij si presidenti që transformoi ekonominë e Francës për shekullin e 21-të. Por në vend të kësaj, ai sot e sheh lidershipin e tij të kontestuar, si në parlament ashtu edhe në rrugët e qyteteve të mëdha.
Lëvizja e tij për të për reformën e pensioneve ka zemëruar opozitën politike dhe mund të bëhet pengesë për ligje të tjera në katër vitet e mbetura të mandatit të tij.
Demonstruesit e ngritën këtë foto në protesta pasi Macron zgjodhi në minutën e fundit të përdorte fuqinë kushtetuese të qeverisë për të miratuar projektligjin pa votim në Asamblenë Kombëtare. Macron nuk ka folur për këtë temë që nga ajo ditë.
Që kur u bë president në vitin 2017, Macron shpesh është akuzuar për arrogancë dhe mungesë kontakti. I perceptuar si "presidenti i të pasurve", ai ngjalli pakënaqësi pasi i tha një njeriu të papunë se i duhej vetëm "të kalonte rrugën" për të gjetur punë dhe ka nënkuptuar se disa punëtorë francezë ishin "dembelë".
Në qershor, aleanca centriste e Macron humbi shumicën e saj parlamentare, megjithëse ajo ende mban më shumë vende se partitë e tjera politike. Ai tha në atë kohë se qeveria e tij donte të "bënte ligje në një mënyrë tjetër", bazuar në kompromise me një sërë grupesh politike.
Që atëherë, ligjvënësit konservatorë kanë rënë dakord të mbështesin disa projektligje që përshtaten me politikat e tyre. Por tensionet mbi planin e pensioneve dhe mungesa e përhapur e besimit midis partive ideologjikisht të ndryshme, mund t'i japin fund përpjekjeve për të kërkuar kompromis.
Kundërshtarët politikë të Macron në Asamblenë Kombëtare depozituan dy mocione mosbesimi të premten kundër qeverisë së kryeministres Elisabeth Borne. Zyrtarët qeveritarë shpresojnë t'i mbijetojnë një votimi mbi mocionet e parashikuara të hënën, sepse opozita është e ndarë, ndërsa shumë republikanë pritet të mos e mbështesin.
Megjithatë, nëse një mocion kalon, do të ishte një goditje e madhe për Macron: projektligji i pensioneve do të refuzohej dhe kabineti i tij do të duhej të jepte dorëheqjen. Në atë rast, presidenti duhet të emërojë një kabinet të ri dhe të gjejë zgjidhje për të miratuar ligjet.
Por Macron ruan fuqi të konsiderueshme mbi politikën e jashtme, çështjet evropiane dhe mbrojtjen. Si komandant i përgjithshëm i forcave të armatosura, ai mund të marrë vendime për mbështetjen e Francës për Ukrainën dhe çështje të tjera globale pa miratimin e Parlamentit.
Fuqitë e forta presidenciale të Francës janë një trashëgimi nga dëshira e gjeneralit Charles de Gaulle për të pasur një sistem politik të qëndrueshëm për Republikën e Pestë që ai themeloi në 1958.
E ardhmja e kryeministrit duket më pak e sigurt. Nëse mocionet e mosbesimit dështojnë, Macron mund të miratojë moshën më të lartë të pensionit, por të përpiqet të qetësojë kritikët e tij me një riorganizim të qeverisë. Por Borne nuk ka dhënë asnjë indikacion për tërheqje.
"Jam e bindur se do të ndërtojmë zgjidhjet e mira që i duhen vendit tonë duke vazhduar të kërkojmë kompromise me sindikatat e punëtorëve dhe organizatat e punëdhënësve," tha ajo, duke folur të enjten në rrjetin televiziv francez TF1. "Ka shumë tema mbi të cilat ne duhet të vazhdojë të punojë në parlament”.
/ Me shkurtime nga France 24 /
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
