Sekuestrohet kokainë dhe kanabis në Tiranë, dy të arrestuar

Goditen dy raste në fushën e narkotikëve në Tiranë, duke sekuestruar kokainë dhe kanabis sativa.

Në rrugën “Prokop Mima”, shërbimet e policisë kanë arrestuar në flagrancë shtetasin D. S., 22 vjeç, pasi gjatë kontrollit fizik nga shërbimet e policisë, iu gjet dhe iu sekuestrua, një sasi lënde e dyshuar narkotike, e llojit kokainë.

Pas verifikimeve të kryera ka rezultuar se shtetasi D. S., pasi siguronte lëndën narkotike të llojit kokainë, e ndante atë më pas dhe e shiste në doza, në rrugën “Prokop Mima”.

Gjithashtu, specialistët e Seksionit për Hetimin e Narkotikëve arrestuan në flagrancë A. N., 22 vjeç, banues në Tiranë, për veprën penale “Prodhimi dhe shitja e narkotikëve”, si dhe u proceduan në gjendje të lirë shtetasit: S. B., 23 vjeç, për veprën penale “Prodhimi dhe shitja e narkotikëve”, dhe R. Z., 40 vjeç, për veprën penale “Përshtatja e lokalit për përdorim droge”.

Gjatë kontrollit në ambientet e lokalit të shtetasit R. Z., të cilin ky shtetas e kishte përshtatur për përdorim droge, nga shërbimet e Policisë, shtetasit A. N. iu gjet dhe iu sekuestrua, në cilësinë e provës materiale, një sasi lënde e dyshuar narkotike e llojit kokainë, ndërsa shtetasit S. B., iu gjet dhe iu sekuestrua një sasi e vogël lënde e dyshuar narkotike kanabis sativa.

Materialet i kaluan Prokurorisë, për veprime të mëtejshme procedurale.