Analisti Ben Andoni, komenton zgjedhjet e pjesshme që po mbahen në 6 bashki, për të zgjedhur gjashtë kryebashkiakët.
Lidhur me pjesëmarrjen e deritanishme në shifrën 15.3%, Andoni tha për MCN TV, fuqia e zgjedhësve është më shumë në aspektin politik.
Ai deklaroi se përplasjet kanë qenë gjithmonë ndërmjet njerëzve të Partisë Demokratike dhe fraksionit të Partisë Demokratike të përfaqësuar nga “Shtëpia e Lirisë”.
“Këto zgjedhje të pjesshme na kanë mësuar, mosfunksionim real të shtetit tonë dhe mosdaljen përpara situatave të tilla. Është e papranueshme që në këto zgjedhje të mos ketë prani komisionerësh. Mendoj se deri diku është e qëllimshme. Largimi i kaq komisionerëve, është diçka e qëllimshme. Në procese zgjedhore me paratë që hidhen në zgjedhje, qoftë dhe në të pjesshme, shteti ka rolin e vetë për të ndihmuar mbarëvajtjen e duhur të zgjedhjeve. Në Dibër nuk ka energji, në Shkodër ka pasur probleme pafund prej kushteve. Në Lushnjë, vetë kandidatja nuk e gjeti veten të identifikuar. KQZ duhej të asistohej më shumë nga shteti. Do isha shumë optimist që pjesëmarrja të shkonte në 40%. Këto zgjedhje janë parë më shumë si politike brenda PD, se sa për administratorin e qytetit”.
Ai shoi se rëndësi më të madhe ka që të adresohen problematikat dhe njerëzit që merren me proceset zgjedhore, grupet e interesit, të mos jenë thjesht garniturë kur bëhet reforma zgjedhore.
Andoni shprehu si shqetësim, se jemi në vitin 2022 dhe ne nuk arrijmë dot të bëjmë zgjedhje normale dhe se numërimi i votave bëhet në qendër, duke kërkuar që të hiqet ky mosbesim i madh.
“Të gjithë këta elementë ka të bëjnë që nëse reforma zgjedhore bëhet në kohën e caktuar, duhen adresuar për ti thjeshtuar sa më shumë, për të futur votimin elektronik në qytetet kryesore të vendit. Është koha e duhur që të aplikohet edhe në rrethet kryesore të vendit”.
Lidhur me thirrjen e ambasadores Yuri Kim, për kandidatët, Andoni nënvizoi se në momentin që ambasada merr përsipër pjesën e vëzhguesit, ka rënë dakord.
“Kur ambasada përfshihet kaq shumë në votime, mendoj se është e tepruar. Nuk duhet të ishte. Janë vetë partitë politike që duhet të mendohen për mesazhet e dhënë për non gratat. PS nuk duhet ta përfshinte Vangjush Dakon në fushatë. Përfshirja e ambasadës është e tepruar. Me gjithë postimin shumë pozitiv dhe inkurajues të ambasadës, mjafton të shohësh këtë madhësi të komisionit me 8-9 anëtarë, shikon që reformës tonë zgjedhore i mungojnë shumë elementë”.
Andoni deklaroi se e sheh shumë të vështirë ndryshimin në Shkodër, duke thënë se zakonisht në Shkodër votohet me ngjyrat partiake dhe jo me interesin për qytetin.
Ai shprehu dyshim se sa do i besohet një zonje nga ana e Partisë Socialiste, ashtu si zotit Bardh Spahia, i cili është rezident në Tiranë.
“Këto janë edhe paradokset. Ndërsa zoti Bushati ka qenë i përfshirë më parë në strukturat bashkiake. Duket se e majta mund të përfitojnë nga kjo përçarje shumë e madhe”.
Ai shtoi më tej se është ende herët që Lulzim Basha dhe Sali Berisha të bashkohen.
“Nuk mund të shkojnë më të ndarë, do i diktojë nevoja e kohës dhe zgjedhjeve që po afrohen. Për tu futur siç duhet në sistem. Në komisionin parlamentar të inceneratorëve, ata kanë qenë bashkë. Në projekte të tjera kanë qenë bashkë. Berisha e kupton shumë mirë, se sado që të jenë kundër zotit Basha, lufta do bëhet në parlament. Këto zgjedhje janë indikatorë, për të parë se ku është publiku me Partinë Socialiste”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
