FBI ka hapur një hetim mbi pretendimet nga fushata e Donald Trump, se ishte në shënjestër të hakerave që punonin për qeverinë iraniane.
“Mund të konfirmojmë se FBI po heton çështjen”, tha agjencia në një deklaratë të shkurtër të hënën, pa përmendur specifikisht ish-presidentin apo Iranin.
Një zëdhënës i fushatës së Trump tha për BBC se dokumentet janë marrë në mënyrë të paligjshme nga burime të huaja armiqësore ndaj Shteteve të Bashkuara të Amerikës.
Zyrtarët iranianë kanë mohuar çdo lidhje me hakerimin dhe qeveria amerikane nuk e ka akuzuar zyrtarisht Iranin.
FBI po shqyrton edhe nëse hakerët iranianë kanë shënjestruar fushatën Joe Biden-Kamala Harris, sipas CBS News, partneri i lajmeve i BBC-së, duke cituar persona të njohur me hetimin.
Deklarata e fushatës së Trump erdhi një ditë pasi Microsoft publikoi një raport i cili tregonte se hakerat iranianë kishin shënjestruar fushatën e një kandidati të paidentifikuar presidencial të SHBA-së në muajin qershor.
Qendra e Analizës së Kërcënimeve të Microsoft, tha se fushatës iu dërgua një email spear-phishing, një mesazh i krijuar për t’u dukur i besueshëm në mënyrë që të detyrohet objektivi të klikojë në një lidhje me qëllim të keq.
Sipas Washington Post, hetimi i FBI-së për tentativat e hakerimit u hap për herë të parë në qershor.
Kongresmeni demokrat Adam Schiff ishte në mesin e disa ligjvënësve që i bënë thirrje FBI-së të zbulojë atë që di për përpjekjet e hakerëve.
Ai tha se komuniteti i inteligjencës amerikane lëvizi shumë ngadalë për të identifikuar siç duhet skemën e hakerimit dhe hedhjes të kryer nga Rusia në vitin 2016 dhe duhet të veprojë shpejt.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
