Kurti: Serbia të hapë arkivat. Strategjia e Millosheviçit “pa kufomë nuk ka krim” po ndiqet edhe sot

<p>Në Ditën Ndërkombëtare të Personave të Zhdukur, kryeministri i Kosovës, Albin Kurti, ka kërkuar hapjen e arkivave të shtetit serb për krimet e kryera në Kosovë.</p> <p>Duke iu referuar një shprehjeje të Sllobodan Millosheviçit sipas të cilit, “<strong><em>nëse nuk ka kufomë, nuk ka krim</em></strong>”, Kurti <a href="https://zeri.info/aktuale/548271/kurti-kerkon-hapjen-e-arkivave-serbe-strategjia-e-millosheviqit-ska-kufome-ska-krim-po-vazhdohet-edhe-sot/">tha se </a>e njëjta strategji po ndiqet edhe sot nga autoritetet serbe.</p> <p>Sipas tij, qeveria e Kosovës mbetet e përkushtuar për gjetjen e personave të zhdukur dhe për këtë kanë nisur përgatitjet për gërmime në disa lokacione të Serbisë.</p> <p>“<em>Sivjet janë bërë 25 vjet nga përfundimi i luftës në Kosovë. Forcat e Serbisë kryen mijëra masakra dhe zhdukje me dhunë të popullit të Kosovës. ‘Nuk ka kufomë, nuk ka krim’, ishte strategjia e serbëve për krimet e kryera në Kosovë. Kjo strategji vazhdon të zbatohet edhe sot nga pasardhësit politikë të Millosheviçit në Beograd</em>”.</p> <blockquote> <p><em>Këtë javë kanë filluar përgatitjet për gërmime në Serbi. Deri më tani shteti serb nuk ka ndarë të dhënat nga arkivat e tyre për këtë lokacion. Edhe sot e përsërisim kërkesën tonë, për hapjen e arkivave, siç jemi dakorduar edhe në Bruksel.</em></p> </blockquote> <p>Gjatë luftës së Kosovës janë zhdukur 1 585 persona.</p>