Dy të rinj u arrestuan nga policia e Tiranës për shpërndarje droge. Sipas njoftimit të policisë, të arrestuarit janë Xhuljano Kasa, 22 vjeç, ushtar profesionist në Komandën e Forcave Tokësore dhe Denis Kanani, 21 vjeç, nga Tirana.
Dyshimet për përfshirjen e dy të rinjve në shitjen e drogërave të forta nisën pasi në një lokal ata u panë me një qese të dyshimtë. Kontrolli në banesat e tyre çoi në sekuestrimin e një sasie kokainë, kanabis dhe një armë tip pistoletë.
Njoftimi i policisë
Seksioni për hetimin e narkotikëve në bashkëpunim me komisariatin nr.6, pranë D.V.P.Tiranë, më datë 03.10.2017, arrestuan shtetasit : - Xhuljano Kasa, 22 vjeç, banues në Tiranë (me funksion ushtar profesionist në Komandën e Forcave Tokësore) - Denis Kanani, 21 vjeç, banues në Tiranë. Këta dy shtetas janë konstatuar të ulur në një lokal në rrugën "Llambi Bonata", ku gjatë kontrollit të ushtruar nga shërbimet e policisë, në tavolinën ku këta dy shtetas ishin ulur janë gjetur qese të tejdukshme me lëndë të dyshuar narkotike, të mbuluara me një xhup. Në vijim janë ushtruar kontrolle në banesat e dy shtetasve të mësipërm ku : Gjatë kontrollit të ushtruar në banesën e shtetasit Xhuljano Kasa, poshtë dyshekut të krevatit është gjetur një qese me sasi të konsiderueshme pluhuri të bardhë, (i ndarë në doza) dhe një dokument identifikimi ushtarak, të cilin e paraqiste për t'iu shmangur kontrolleve të policisë, ndërsa gjatë kontrollit të ushtruar në banesën e shtetasit Denis Kanani, është gjetur një pistoletë e tipit "Magnum", me kalibër 9 mm. Janë sekuestruar në cilësinë e provës materiale:
- 79 gramë lëndë e dyshuar narkotike e llojit kokainë. - 582 lëndë e dyshuar narkotike e llojit Cannabis Sativa.
- pistoletë e llojit "Magnum", e kalibrit 9 mm.
- 3 telefona celularë.
- dokument identifikimi ushtarak ( i shtetasit Xhuljano Kasa). Materialet iu referuan Prokurorisë së Rrethit Gjyqësorë Tiranë, në ngarkim të shtetasve të lartpërmendur për veprat penale "Prodhim dhe shitje lëndësh narkotike e kryer në bashkëpunim" dhe "Prodhim dhe mbajtja pa leje e armëve dhe municionit luftarak", parashikuar nga nenet 283/2 dhe 278 të Kodit Penal.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
