Shtohen kapacitetet për përballimin e koronavirusit në Shqipëri. Tridhjetë respiratorë të rinj u janë shtuar sot kapaciteteve publike, falë mbështetjes nga qeveritë e Zvicrës dhe Norvegjisë si dhe nga PNUD, zyra e Organizatës së Kombeve të Bashkuara në Shqipëri. Një ndihmë e tillë vjen në momentin kur numri i rasteve të reja me koronavirus sa vjen e rritet, ndërsa Komiteti i Ekspertëve e përjashtoi mundësinë e rikthimit të karantinës.
E pranishme në ceremoninë e marrjes në dorëzim të respiratorëve të rinj, ministrja e Shëndetësisë dhe Mbrojtjes Sociale, Ogerta Manastirliu, theksoi se kjo është një mbështetje për fuqizimin e shërbimit të terapisë intensive në vendin tonë.
“30 respiratorët që vijnë nga kjo marrëveshje është me të vërtetë një mbështetje më shumë për fuqizimin e shërbimit të terapisë intensive në vendin tonë. Një pjesë e respiratorëve të cilët sot kanë ardhur, do të jenë për fuqizimin e shërbimit të terapisë intensive në këtë spital. Një pjesë në spitalin “Shefqet Ndroqi” dhe do të vijojmë të fuqizojmë edhe kapacitetet për sa i përket spitaleve të tjera të cilat ne i kemi cilësuar si spitale Covid”, tha Manastirliu.
Një ditë më parë, Komiteti i Ekspertëve theksoi se e vetmja mënyrë për të parandaluar përhapjen e koronavirusit mbetet respektimi i rregullave të higjienës dhe distancimit social. Të njëjtën gjë, Manastirliu e ritheksoi sot.
“Është shumë e rëndësishme të ruajmë dhe të respektojmë ato masa të thjeshta, në dukje të thjeshta, por që duhet të bëhen pjesë e jetës tonë, që është distancimi fizik, që është ruajtja e higjienës personale, mbajtja patjetër e maskave kur nuk është e mundur të ruhet distancimi fizik”, tha Manastirliu.
Të pranishëm në ceremoninë e dorëzimit ishin ambasadori norvegjez në Shqipëri, Jens Erik Grondahl, zëvendësshefi i Misionit në Ambasadën e Zvicrës, Patrik Meier, si dhe përfaqësuesja e Përhershme e PNUD, Limya Eltayeb.
Qeveria zvicerane ka dhuruar 330 000 dollarë, qeveria norvegjeze 3 000 000 kruna norvegjeze (afërsisht 300 000 dollarë) dhe PNUD 150 000 dollarë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
