Me vendndodhjen e saj gjeografike, Bullgaria mund të ndihmojë shumë në përmirësimin e marrëdhënieve të fqinjësisë në integrimin e vendeve të Ballkanit Perëndimor në BE. Kështu u shpreh kancelarja gjermane, Angela Merkel, gjatë një vizite pune në Bullgari me ftesë të kryeministrit Bojko Borisov.
Merkel i kushtoi një rëndësi të veçantë takimit joformal të planifikuar midis liderëve të vendeve nga rajoni, që do të zhvillohet në Sofje. “Presidenca e Bullgarisë në BE është e përgatitur mirë. Por mirëqenia dhe paqja në Europë kanë nevojë për pjesëmarrjen e Ballkanit Perëndimor dhe perspektivën e tyre europiane. Bashkëveprimi dhe ndërlidhja duhet të përmirësohen me infrastrukturën hekurudhore, për të cilat Gjermania dhe Bullgaria do të bashkëpunojnë ngushtë”, tha Merkel.
Kancelarja gjermane e falënderoi Bullgarinë në lidhje me mbrojtjen e kufijve të BE-së, një detyrë e vështirë sipas saj. “Gjermania dhe Frontex-i po e mbështesin Bullgarinë , por puna më e madhe bëhet këtu”, tha ajo.
Merkel u shpreh se mbështet inicitivën e presidentit Borisov për një takim me përfaqësuesit e Turqisë, në prani të presidentëve të Këshillit të Europës, Komisionit Europian dhe Parlamentit Europian, në lidhje me çështjet e mbetura pezull mes dy vendeve. Kryeministri bullgar tha se ky takim është parashikuar të mbahet në fundjavë në qytetin bregdetar, Varna.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
