Policia: Gene Hackman vdiq më 17 shkurt

<p>Aktori i njohur i Hollivudit, i cili u gjet i vdekur në shtëpinë e tij të mërkurën, bashkë me të shoqen dhe qenin, mendohet se ka ndërruar jetë më 17 shkurt.</p> <p>Policia e Santa Fe thotë se vdekja mund të ketë ndodhur më 17 shkurt, një javë e gjysmë përpara se trupat e pajetë të tij dhe të gruas të zbuloheshin më 26 shkurt, nga një kujdestar në shtëpinë ku çifti kishte jetuar për rreth 20 vjet.</p> <p>Sherifi Adan Mendoza tha se regjistrimi i fundit në stimuluesin kardiak të aktorit, një pajisje me bateri që ndihmon në rregullimin e ritmit të zemrës, ishte 17 shkurti.</p> <p>Hackman, 95 vjeç dhe Betsy Arakawa, 65 vjeç, u gjetën të vdekur të mërkurën, më 26 shkurt, në dhoma të veçanta. Të dy trupat treguan shenja të dekompozimit të avancuar.</p> <p>Një ekzaminues mjekësor ka përjashtuar helmimin nga monoksidi i karbonit si shkak i vdekjes së çiftit.</p> <p>Si Hackman ashtu edhe gruaja e tij rezultuan negativ për monoksid karboni, por rezultatet e autopsisë dhe toksikologjisë nuk janë bërë ende publike.</p> <p>Si sherifi,&nbsp;ashtu edhe shefi i zjarrfikësve, i thanë emisionit "Today" të NBC sot se teoria e helmimit me gaz, e cila fillimisht u hodh poshtë, është ende e mundshme si shkak i vdekjes së çiftit.</p> <p>Rezultatet e autopsisë dhe toksikologjisë mund të kërkojnë "tre muaj ose më shumë" për t'u përfunduar.</p>