Me thirrjet "Rama ik", protestuesit e opozitës janë mbledhur përpara Parlamentit, pas vendimit të mazhorancës që të mbledhë senacën plenare atë të javës së kaluar e cila u shty për shkak të thirrjes për protest nga ana e opozitës.
Protestuesit e opozitës hedhën kapsolla dhe tymuese përpara Parlamentit dhe në drejtim të forcave poliore, duke tensionuar situatën.
Nga protesta kreu demokrat Lulzim Basha ka paralajmëruar kryeministrin Rama se koha e tij ka marrë fund dhe se ai nuk do të mund ta përdorë parlamentin si një rulotë me rrota.
Madje Basha i ka bërë thirrje dhe policëve që ndodhen përballë protestuesve në mbrojtje të kuvendit, që të bëjnë detyrën e tyre dhe të arrestojnë hajdutët që ndodhen brenda në parlament.
"Nga tmerri i bashkimit popullor, në mënyrë ilegale, ata ndryshuan seancën plenare për t’ju shmangur zemërimit të njerëzve. Kurrë më parë nuk është mbledhur një numër kaq i madh qytetarësh brenda një ore! Lexojeni mirë këtë mesazh, kjo qeveri i ka shpallur luftë popullit me banditët e veshur me pushtet që shkatërrojnë pronën e shqiptarëve. Ne jemi sot këtu me një mesazh të qartë dhe të prerë, që është mesazhi i shumicës së shqiptarëve, të djathtë e të majtë, Edi Rama ti që i ke hequr bukën e gojën shqiptarëve, që i detyron ata të emigrojnë jashtë vendit, nuk ke për ta bërë dot parlamentit rulotë me rrota... ora e të vërtetës ka ardhur dhe koha për fjalët ka mbaruar. Le ta dëgjojë gjithë bota zërin e vetëm që do të dëgjohet nga sot e tutje në këtë vend, zërin e qytetarëve. Ne e kemi nisur këtë betejë për fatin evropian të vendit. Ne luftojmë për vlerat evropiane të zgjedhjeve të lira e të ndershme dhe jo kapjen e drejtësisë për të mbrojtur Dakon, Qazim Sejdinin, Saimir Tahirin e Damian Gjiknurin, të bërë njësh me krimin. Sonte të mbledhur në këtë shesh derisa ta largojmë këtë klikë të korruptuar, le të ushtojë zëri juaj, zëri i qytetarëve. Një thirrje për vëllezërit e motrat me uniformë. Ju qëndroni mes hajdutëve dhe popullit të dhunuar. Hiqini kapelet dhe arrestojini hajdutët siç e kërkon ligji. Arrestojini përpara se t’i arrestojë populli i bashkuar. Asnjë fasadë nuk pi më ujë, kupa është mbushur. Me Edi Ramën nuk do të ketë paqe. Do të vazhdojmë deri në largimin e klikës mashtruese që ka pushtuar vendin", deklaroi Basha.
Ndërsa kryetarja e LSI-së Monika Kryemadhi ka deklaruar se opozita do të jetë kurdo herë, kur parlamenti do të zhvillojë ato që ajo i cilësoi si “seancat e krimit”.
Gjatë fjalës së saj në protestën e opozitës përballë Kuvendit, Kryemadhi është shprehur se Rama është kthyer në fenomenin e vrasjes së shpresës së shqiptarëve.
"Sot parlamenti punon për 5 njerëz. Jo vetëm vodhën, kërcënuan shqiptarët, por i varfëruan ata.Ai parlament ku sot ka më shumë se 4 orë që janë ngujuar deputetët nga frika, tregon dhe njëherë se ai parlament punon vetëm për 5 veta. Ai parlament tregoi se në zemrën e tyre nuk ekziston dashuria për votuesit e tyre socialistë, por vetëm për Vangjushin dhe të gjithë kriminelët e tjerë që bënë Edi Ramën kryeministër. Nuk kemi gjë tjetër për të thënë veçse Rama ik! Prezenca jonë do të jetë çdo ditë dhe moment që selia e parlamentit nuk do të jetë e lirë, sa herë ato do të bëjnë seancat e krimit të organizuar ne do jemi këtu. Sot më shumë se kurrë misioni i politikës është të largojë fenomenin e vrasjes së shpresës së shqiptarëve, ky fenomen e ka emrin Edi Rama", deklaroi Kryemadhi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
