Në prag të 10-vjetorit të pavarësisë, Kosovën e njeh si shtet edhe një vend tjetër

Në prag të 10 vjetorit të pavarësisë, Kosova njihet si shtet edhe nga një vend tjetër.

Lajmi është bërë i ditur nga vetë Ministri i Jashtëm i Kosovës, Behgjet Pacolli.

“Në vigjiljen e festes se madhe të pavarësisë, qe edhe një njohje nga shteti i Barbadosit, Urime Kosovë e dashur”, shkroi Pacolli në Facebook.

Barbadosi është shtet-ishull në Amerikën qendrore, në lindje të Karaibeve.

Me këtë njohje, numri i shteteve që kanë njohur shpalljen e pavarësisë nga Serbia në 17 shkurt 2008 ka arritur në 116.    

Ai ka publikuar një letër që Ministria e Jashtme e Kosovës ka marrë nga Ministria e Jashtme e Barbadosit, ku konfirmohet njohja e Kosovës.

"Ministria e Punëve të Jashtme dhe e Tregtisë së Jashtme e Barbadosit i ofron komplimentet e saj Ministrisë së Punëve të Jashtme të Republikës së Kosovës dhe ka nderin t'i referohet kërkesës së mëparshme nga kjo e fundit për Qeverinë e Barbadosit për njohjen e Kosovës si shtet i pavarur dhe sovran, dhe për themelimin e marrëdhënieve ndërmjet Barbadosit dhe Kosovës", thuhet në letrën e njohjes.