Presidenti rus Vladimir Putin do të udhëtojë në Kinë në muajin maj për të takuar dhe biseduar me Presidentin Xi Jinping, në atë që do të ishte udhëtimi i tij i parë jashtë vendit pas fitores plebishitare në zgjedhjet e fundjavës.
Një lajm i tillë raportohet nga Reuters, duke cituar një burim të afërt me çështjen, i cili tha se “Putini do të vizitojë Kinën”, lajm i konfirmuar në mënyrë të pavarur nga katër burime të tjera, të cilët folën të gjithë në kushte anonimiteti.
Dy burime thanë se vizita e tij do të vijë përpara udhëtimit të planifikuar të presidentit kinez në Evropë.
Kina ka forcuar lidhjet e saj tregtare dhe ushtarake me Rusinë në vitet e fundit pasi Shtetet e Bashkuara të Amerikës dhe aleatët e saj vendosën sanksione kundër të dy vendeve, veçanërisht Moskës për pushtimin e Ukrainës.
Të dy vendet deklaruan një partneritet pa kufij në shkurt 2022 kur Putin vizitoi Pekinin vetëm disa ditë para ndërhyrjes ushtarake në Ukrainë.
Xi vizitoi Rusinë në udhëtimin e tij të parë jashtë shtetit pas pandemisë në mars të vitit të kaluar, pak pasi filloi mandatin e tij të tretë si president kinez.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
