Familja Cani për Mcn Tv: Mbyllja e Tik-Tokut s’ishte zgjidhje! Martini dhe Eraldi u vranë nga mungesa e sigurisë

Në një reagim për Mcn Tv familja e të ndjerit Martin Cani shprehet se mbyllja e TikTok-ut nga qeveria nuk rezultoi në zgjidhje për parandalimin e krimeve te fëmijët pasi një tjetër i mitur, Erald Xhejko, u vra në Maliq. 

Familja Cani kërkon nga qeveria që "të ndërmarrë masa konkrete, jo thjesht reforma kozmetike për opinionin publik", duke përmirësuar sigurinë në shkolla, bashkëpunimin me familjet dhe komunitetet. 

“Martini dhe Eraldi nuk u vranë prej rrjeteve sociale. Ata u vranë nga mungesa e sigurisë”, theksojnë prindrit e Martin Canit në prononcimin e tyre për Mcn Tv. 

“Me gjithë mbylljen e rrjetit social TikTok nga qeveria, një i mitur tjetër u vra nga një bashkëmoshatar në Maliq. Kjo tragjedi e re tregon qartë se mbyllja e TikTok nuk ishte zgjidhje, por vetëm një pretekst politik. Kush e ka radhën që të fajësohet tani për këtë krim të rëndë? Snapchat apo Instagram?

Ne kërkojmë që qeveria të ndërmarrë masa konkrete, jo thjesht reforma kozmetike për opinion publik. Kërkojmë veprime të dukshme dhe efektive për përmirësimin e sigurisë në shkolla, forcimin e bashkëpunimit me familjet, angazhimin e komunitetit dhe fuqizimin e sistemit shëndetësor. Vetëm me masa të tilla mund të parandalohen tragjedi të tjera dhe të shpëtohen jetë fëmijësh.

Martini dhe Eraldi nuk u vranë prej rrjeteve sociale. Ata u vranë nga mungesa e sigurisë, nga papërgjegjësia institucionale dhe nga dështimi i sistemeve që duhet të mbrojnë jetën e fëmijëve. Mbyllja e një aplikacioni nuk e kthen mbrapsht realitetin dhe nuk zgjidh problemet.

Në këtë moment dhimbjeje të madhe, shprehim ngushëllimet më të sinqerta për nënën dhe familjen e të miturit të vrarë në Maliq. E dimë se çfarë do të thotë të humbasësh dritën e jetës, dhe ndajmë me ta dhimbjen e pamasë. Zëri ynë bashkohet me të tyren në thirrjen për drejtësi dhe për masa të vërteta, që asnjë nënë tjetër të mos derdhë lot për fëmijën e saj”.