Thatësira e madhe që ka prekur Amazonën, ndoshta për shkak të ndikimit të El Nino-s, e kombinuar me efektet e ngrohjes globale, po gjunjëzon zona të mëdha të Brazilit.
Rënia e niveleve të lumenjve, në nivelet më të ulëta historike në shumë zona të vendit për shkak të mungesës së zgjatur të reshjeve, ka çuar megjithatë në rishfaqjen e gdhendjeve të lashta shkëmbore që përshkruajnë fytyra njerëzore dhe forma të tjera, për të cilat dimë shumë pak.
Ato ishin parë për herë të fundit më shumë se një dekadë më parë, kur rajoni përjetoi një mungesë të ngjashme uji. Deri më sot, nuk është e qartë se kush i ka gdhendur dhe për çfarë qëllimi.
Zakonisht, këto fytyra shqetësuese janë zhytur nën ujërat e Rio Negro, në një vend të quajtur Ponta das Lajes, pranë qytetit të Manaus, në pikën ku Rio Negro takohet me lumin Amazon.
Rio Negro është aktualisht në nivelin më të ulët në 121 vjet, pasi ka rënë nën 13 metra thellësi për herë të parë në javën e fundit. Mungesa e ujit ka nxjerrë dhjetëra fytyra, shumë më tepër se në vitin 2010, kur thatësira bëri që nivelet e ujit të bien në 13.63 metra.
Megjithatë, arkeologët nuk janë të sigurt se cila popullsi parakolumbiane mund të ketë qenë përgjegjëse për gdhendjet.
“Ne e dimë se rajoni është një vend parakolonial që tregon shenja vendbanimesh që datojnë rreth 1,000-2,000 vjet më parë, shpjegoi arkeologu Jaime Oliveira për mediat lokale. Ajo që ne shohim janë paraqitje të figurave antropomorfe”.
Krahas fytyrave, të cilat tregojnë një sërë shprehjesh të fytyrës, arkeologët gjetën një shkëmb tjetër me brazda që mund të jenë bërë nga gjuetarët e lashtë ose luftëtarët indigjenë duke mprehur shigjetat e tyre.
Thatësira aktuale në Amazonën braziliane ka prodhuar tashmë pasoja katastrofike, me më shumë se 120 delfinë lumenjsh të gjetur të vdekur gjatë javës së fundit të shtatorit për shkak të temperaturave jashtëzakonisht të larta të ujit.
Në qytetin e Manaus-it, më i populluari në të gjithë Amazonën me mbi 2 milionë banorë, nivele shumë më të larta të ndotjes së ajrit janë regjistruar ditët e fundit si pasojë e pluhurit dhe tymrave nga zjarret që kanë shpërthyer në pyjet përreth qytetit.
Kësaj i shtohet edhe mungesa e theksuar e burimeve ujore, të cilat janë reduktuar deri në atë pikë sa kanë kërcënuar jetën e mijëra specieve bimore dhe shtazore dhe kanë lënë të mbytur shumë varka në port.
Për banorët e Manausit, fakti që fytyrat e vjetra janë rishfaqur do të ishte një pararojë e asaj që do të ndodhë nëse nuk bëjmë asgjë për të ndaluar ndryshimin e klimës.
“Ne vijmë, shikojmë (gdhendjet) dhe mendojmë se janë të bukura. Por në të njëjtën kohë, është diçka shqetësuese… Personalisht pyes veten nëse ky lumë do të ekzistojë ende pas 50 apo 100 vjetësh ”, përfundoi Ribeiro.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
