Arrestimi i ambasadorit të Britanisë së Madhe në Iran ka tensionuar edhe marrëdhëniet me këtë vend. Rob Macaire, përfaqësuesi diplomatik i Britanisë në Iran, u arrestua pasi mori pjesë në një ceremoni përkujtimore që u shndërrua në protestë për viktimat e avionit të rrëzuar pak ditë më parë.
Britania e ka dënuar arrestimin e ambasadorit të saj në Iran si "një shkelje flagrante e ligjit ndërkombëtar". Zyra e Jashtme dhe Bashkësia e Mbretërisë së Bashkuar tha në një deklaratë se ambasadori Rob Macaire, u la i lirë pas një "ndalimi të shkurtër".
Macaire njoftoi në Tuiter se ishte "arrestuar për gjysmë ore", pasi u largua nga një event në përkujtim të viktimave", pasi Irani pranoi se qëlloi pa dashje avionin e linjës ukrainase, duke vrarë të gjithë 176 pasagjerët dhe ekuipazhin.
"Është normale të nderosh kujtimin e tyre, disa prej viktimave ishin britanike. Unë u largova pas 5 minutash, kur disa prej të pranishmëve nisën të brohorasin”, sqaroi ai me një postim në Tuiter.
"Arrestimi i diplomatëve është, natyrisht, i paligjshëm, në çdo vend", shtoi Macaire.
Sekretari i Jashtëm britanik, Dominic Raab, tha: "Arrestimi i ambasadorit tonë në Teheran pa arsye ose shpjegime është një shkelje flagrante e ligjit ndërkombëtar. Qeveria iraniane është në një moment delikat. Ajo mund të vazhdojë marshimin e saj duke u izoluar politikusht dhe ekonomikisht, ose të ndërmarrë hapa për të ulur tensionet dhe të angazhohet në një rrugë diplomatike përpara."
Zëvendësministri i Jashtëm i Iranit, Abbas Araghchi, shkroi në Tuiter se Macaire nuk u arrestua si diplomat, por “si një i huaj i panjohur në një tubim të paligjshëm". Araghchi tha që sapo u identifikua, ambasadori u la i lirë.
Megjithatë, situata mbetet e tensionuar. Qindra protestues, besnikë të regjimit, u mblodhën para Ambasadës Britanike në Teheran dhe dogjën flamurin britanik.
Ndërkohë, vjen apeli i kreut të Shtëpisë së Bardhë, Donald Trump. “Për udhëheqësit e Iranit: mos i vritni demonstruesit. Ju keni vrarë e burgosur mijëra prej tyre dhe bota po shikon. Më e rëndësishmja, SHBA po shikon. Riktheni internetin dhe lërini gazetarët të raportojnë! Mjaft e vratë popullin e shkëlqyer iranian", shkroi ai në Tuiter.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
