Një krim në familje është parandaluar nga Policia e Tiranës, ndërsa është vënë në pranga një 41-vjeçar. Sipas informacioneve të Policisë, 41-vjeçari shkeli urdhrin e mbrojtjes dhe kërcënoi me thikë bashkëshorten e tij, ndërsa falë ndërhyrjes në kohë të Policisë u shmang edhe tragjedia. 41-vjeçari mësohet gjithashtu se ishte i dënuar më parë për veprën penale “Dhuna në familje”.
“Shërbimet e Komisariatit të Policisë Nr. 6, pas njoftimit të marrë se në Yrshek, në ambientet e banesës, shtetasi Ç. M. kishte shkelur urdhrin e mbrojtjes të vendosur nga Gjykata për bashkëshorten e tij dhe po ushtronte dhunë fizike dhe psikologjike ndaj saj, si dhe po e kërcënonte atë me thikë, menjëherë kanë shkuar në adresën e dhënë duke parandaluar përshkallëzimin e mëtejshëm të dhunës dhe ngjarjen e mundshme kriminale”, njoftoi Policia.
Shërbimet e Policisë kanë prangosur shtetasin Ç. M., 41 vjeç, si dhe kanë sekuestruar në cilësinë e provës materiale mjetin prerës (thikë), me të cilën ky shtetas e kërcënonte për ta vrarë bashkëshorten e tij. Materialet i kalojnë Prokurorisë pranë Gjykatës së Shkallës së Parë Tiranë, për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
